काठमाडौं (हाम्रो खेलकुद)– नेपाली राष्ट्रिय फुटबल टोलीका पूर्व कप्तान अनिल गुरुङलाई चाबहिलको लुम्बिनी एकेडेमीले आफ्नो स्पोर्टस एम्बेसडर नियुक्त गरेको छ । अनिल र एकेडेमीका प्रबन्ध निर्देशक रविन चन्द्र कोइरालाले आज सम्झौता पत्रमा हस्ताक्षर गरेका थिए ।

सम्झौता एक वर्षको रहेको अनिलले हाम्रो खेलकुद डटकमलाई जानकारी दिए । एकेडेमीसँग वर्षको ३ लाख रुपैयाँमा सम्झौता भएको अनिलले बताए । लक्ष्मी हुन्डाई मनाङ मस्र्याङ्दी क्लबका कप्तान समेत रहेका अनिलले अन्तर्राष्ट्रिय फुटबलबाट सन्यास लिएपछि अझै आफुलाई फुटबल मार्फत स्पोर्टस एम्बेसडर नियुक्त गरेकामा खुसी व्यक्त गरे ।

‘अझै म मा केही छ भन्ने महसुस गरेको छु’, उनले भने, ‘मेरो खेल जीवनलाई हेरेर नयाँ पुस्ताका भाईबहिनीहरु प्रेरित हुन्छन् भन्ने त्यो मेरो लागि खुसीको कुरा हो ।’ एकेडेमीको खेलकुद गतिविधिमा एक वर्षसम्म सहभागी हुनेछन् । झन्डै दुई महिना अघि फिलिपिन्ससँगको खेलसँगै अनिलले अन्तर्राष्ट्रिय फुटबलबाट सन्यास लिएका थिए ।

फिलिपिन्ससँगको खेल उनको खेल जीवनको ५० औं अन्तर्राष्ट्रिय खेल पनि थियो । घरेलु फुटबलमा भने उनले अझै केही वर्ष सक्रिय रहने बताएका छन् । उनको कप्तानीमा मनाङले धनगढीमा जारी नेपाल आइस सुदूरपश्चिम खप्तड गोल्ड कप फुटबल प्रतियोगितामा भाग लिदैछ ।

साविक विजेता समेत रहेको अनिलको टोलीले पुस २८ मा पहिलो खेल खेल्नेछ । मनाङ टोली भोली धनगढीतर्फ लाग्ने पनि अनिलले जानकारी दिए । एकेडेमीले त्यसअघि राष्ट्रिय क्रिकेट टोलीका सदस्य सोमपाल कामी तथा पूर्व मिस नेपालद्वय माल्भिका सुब्बा र अश्मि श्रेष्ठलाई पनि एम्बेसडर नियुक्त गरेको अनिलले जानकारी दिए ।