म्याड्रिड (एजेन्सी)– बलोन डि’ओर विजेता क्रिस्टियानो रोनाल्डोसँग सम्झौतामा नयाँ सुधारका विषयमा ला लिगा महारथी रियल म्याड्रिड अझै निश्चित हुन सकेको छैन । गत वर्षको जनवरीदेखि नै रोनाल्डो भने क्लबसँगको सम्झौतामा सुधार चाहि रहेका छन् ।

स्पेनिस पत्रिका मार्साका अनुसार सन् २०१७ मा थ्रुपै व्यक्तिगत अवार्ड जितेसँगै रोनाल्डो विश्वको सबैभन्दा बढी पारिश्रमिक पाउने खेलाडी बन्न चाहन्थे । रियलले पनि रोनाल्डोलाई खरिद गर्ने क्षमता राख्ने पिएसजी र म्यानचेस्टर सिटीसँग छलफल चलाएको थियो । तर, ती क्लबले भने पछिल्लो समय खासै चासो देखाएका छैनन् ।

यसअघि दुई पटक रियलले रोनाल्डोसँगको सम्झौता सुधार गरेको थियो । गेराथ बेलको आगमनमा रोनाल्डो खुसी नभएका कारण एकपटक र अर्को पटक १४ महिनाअघि २० मिलियन युरोमा सन् २०२१ सम्म नयाँ सम्झौता सुधार गरिएको हो ।

सम्झौतामा सुधारका लागि अहिले भने क्लब खासै उत्साहित देखिएको छैन । त्यसको अर्को कारण रोनाल्डो तथा रियलले यो सिजन उच्च प्रदर्शन गर्न सकेका छैनन् । मार्साका अनुसार पोर्चुगलका उनका सहकर्मी पेपे र फाबियो कोन्ट्राउ साथै कोलम्बियाका स्टार हामेस रोड्रिगेज बाहिरिएपछि ड्रेसिङ रुममा रोनाल्डोको हैसियत टोलीका अन्य खेलाडीकै सरह भएको छ ।