तनहुँ(हाम्रो खेलकुद)– तनहँ जिल्ला फुटबल संघ अध्यक्ष रत्नकुमार श्रेष्ठसहित १३ सदस्यीय कार्यसमिति आज निर्विरोध चयन भएको छ । अखिल नेपाल फुटबल संघ (एन्फा) का केन्द्रिय सदस्य समेत रहेको श्रेष्ठ लगातार पाँचौं पटक अध्यक्षमा निर्विरोध चयन भएका थिए ।

एन्फाका सहायक महासचिव गणेश भट्टराई केन्द्रिय प्रतिनिधि रहेको साधारण सभाले चार वर्षे कार्यसमितिको उपाध्यक्ष मोहनकुमार श्रेष्ठ, बसन थापा, रविन पौडेल चयन भए । त्यस्तै सदस्य नेत्र गुरुङ, चन्द्रबहादुर आले, सत्यभक्त पालिखे, दिनेश केसी, हरि तिमिल्सिना, जीवन चन्द ठकुरी, सुमन श्रेष्ठ, किशोर खनाल र महिला सदस्य सुनिता विक निर्वाचित भए । कार्यसमितिको पहिलो बैठकले ज्योति श्रेष्ठलाई महासचिव र विनोद गुरुङलाई कोषाध्यक्ष मनोनित गर्यो ।

त्यस्तै नयाँ कार्यसमितिले वसन्तबहादुर आले र सुरेन्द्रकुमार श्रेष्ठलाई मानार्थ उपाध्यक्ष, टिकाराम पनेरुलाई उप महासचिव, जीवन गुरुङलाई सह सचिव तथा सुरेश घिमिरेलाई सह कोषाध्यक्ष मनोनित गरेको छ । जिल्लामा सबैलाई समेट्ने उद्देश्यका साथ केन्द्रमा जस्तै फुटबलमा सक्रिय व्यक्तिलाई कार्यसमितिको विभिन्न पदमा मनार्थ हैसियतमा मनोनित गरको अध्यक्ष श्रेष्ठले बताए ।

साधारण सभाका मुख्य अतिथि व्यास नगरपालिकाका मेयर वैकुण्ठ न्यौपाने स्थानिय खेलकुद विकासका लागि तनहँुका स्थानिय निकायले सहकार्य गर्नेमा जोड दिए । उनले स्थानिय निकायले खेलकुद विकासका लागि अक्षयकोष स्थापनाको पहल गर्ने बताए । श्रेष्ठका अनुसार मेयर न्यौपानले तनहुँका ४ नगरपालिका र ६ गाँउपालिकाबाट ५ लाख रुपैयाँको दरमा संकलन गरि फुटबल लगायत अन्य खेलकुदका लागि लगानी गरिने जानकारी दिए ।

तनहुँ फुटबलका अध्यक्ष श्रेष्ठले जिल्लाको फुटबल विकासमा निरन्तर दुई दशकदेखि सक्रिय रहेको र फेरि एकपटक सबैले विश्वास देखाएकोले आफुले विकासका लागि सक्दो पहल गर्ने बताए । उनले भने,’ केन्द्रमा पनि रहेकाले तनहँु जिल्लाको फुटबल विकासमा म लागि पर्नेछु । ‘ एन्फाको चैतमा हुने केन्द्रिय निर्वाचनका लागि अहिले जिल्ला निर्वाचन भइरहेको छ । जिल्ला निर्वाचनका लागि एन्फाले पुस ५ देखि माघ ५ गते सम्म समय तोकेको छ । एन्फा केन्द्रिय समितिको निर्वाचन चैत १४ गते हुनेछ ।