काठमाडौं (हाम्रो खेलकुद)– दुई विभागीय टोली त्रिभुवन आर्मी क्लब र नेपाल एपीएफ क्लब १६ औं महिला राष्ट्रिय लिग फुटबलको सुपर लिगमा सहज जित निकालेका छन् । सातदोबाटोस्थित एन्फा कम्प्लेक्सको खेल मैदानमा आइतबार भएको सुपर लिगको पहिलो खेलमा आर्मीले अर्को विभागिय टोली नेपाल पुलिस क्लबमाथि ४–१ को सहज जित निकाल्यो । एपीएफले सुदूरपश्चिममाथि ९–० को फराकलो अन्तरले हरायो ।

सुदुर पश्चिमविरुद्ध बल अघि बढाउँदै एपीएफकी सावित्रा भण्डारी ।

राखेप च्याम्पियनसिप अन्तर्गत रहेको महिला लिगअन्तर्गत सुपर लिगको पहिलो खेलमा आर्मीलाई जित दिलाउन कृष्णा खत्री र अन्जली वाइवाले समान २ गोल गरे । पुलिसकी कप्तान घिम कुमारी गुरुङले एक गोल फर्काइन् । खेलको २० औं मिनेटमा अन्जलीको गोलबाट अग्रता लिएको थियो । अन्जलीको फ्रिकिक सोझै गोलमा परिणत भएको थियो । २९ औं मिनेटमा पुलिसकी घिमले बराबरी गोल फर्काएपछि पहिलो हाफ १–१ गोलको बराबरीमा सकिएको थियो ।

दोस्रो हाफ आर्मीको एकपक्षिय रह्यो । ५७ औं मिनेटमा अन्जलीकै गोलबाट आर्मीले पुनः अग्रता लियो । कृष्णाले ७० औं र ७५ औं मिनेटमा गोल गर्दै आर्मीको जित निश्चित पारिन् । आर्मीका प्रशिक्षक आदर्श मल्लले टिमवर्कले खेल्दा सहज जित हात पार्न सकिएको बताए । पुलिसका प्रशिक्षक सन्जव जोशीले योजना अनुरुप खेल्न नसक्दा हार बेहोर्नु परेको बताए ।

पुलिसविरुद्ध गोल गर्ने प्रयासमा अार्मीकी कृष्णा खत्री l

अर्को खेलमा एपिएफले सहज निकाल्यो । एपीएफको फराकिलो जितमा सावित्रा भण्डारीले दोहोरो ह्याट्रिक पूरा गर्दा अनिता बस्नेतले २ तथा रेखा पौडेलले १ गोल गरिन् ८ औं मिनेटमा पहिलो गोल गरेका सावित्राले ४९ र ७३ औं मिनेटमा ह्याट्रिक पूरा गरिन् । त्यस्तै ७६, ८४ र ९० औं मिनेटमा गोल गर्दै सावित्राले दोहोरो ह्याट्रिक पूरा गरिन् ।

अनिताले ५६ औं र ६० मिनेटमा गोल गरिनन् । त्यस्तै रेखाले इन्जुरी समयमा गोल गरेकी थिइन् । लिग अन्र्तगत सोमबार कुनै खेल हुनेछैन । मंगलबार नेपाल पुलस क्लब र सुदूरपश्चिम तथा दोस्रो खेलमा विभागीय नेपाल एपीएफ क्लब र त्रिभुवन आर्मी क्लबबीच खेल हुनेछ ।

लिगको विजेताले २ लाख रुपैया प्राप्त गर्नेछ । उपविजेताले १ लाख तथा तेस्रो हुनेले ५० हजार रुपैया प्राप्त गर्नेछ । लिगको उत्कृष्ट गोलरक्षक, डिफेन्डर, मिडफिल्डर र फरवार्ड र प्रशिक्षकले जनही २५–२५ हजार प्राप्त गर्नेछन् ।