बार्सिलोना (एजेन्सी) – प्रिमियर लिग क्लब लिभरपुलका स्टार खेलाडि फिलिप कौटिन्होलाई बार्सिलोनाले १ सय ६० मिलियन पाउन्डमा भित्राउने पक्का भएको छ । गत सिजनदेखि नै चर्चामा रहेको कौटिन्होको ट्रान्सफर भोलिसम्म आधिकारिक रुपमै पक्का हुने छ ।

कौटिन्हो शनिबार राति नै सम्झौता पक्का गर्न बार्सिलोना जाँदै छन् । कौटिन्होले यस अघि एभर्टनसँगको एफए कप खेलबाट आफ्नो नाम फिर्ता लिँदै बार्सिलोना जाने पक्का सङ्केत दिएका थिए ।

बार्सिलोनाका नेयमार पेरिस सेन्ट जर्मन (पिएसजी) गएयता बार्सिलोनाले उनको स्थानमा कौटिन्हो ल्याउन खोजे पनि सम्झौता पक्का हुन सकेको थिएन । बार्सिलोनाले भित्राएको युवा खेलाडि उस्माने डेम्बेले भने चोटका कारण अधिकांश सिजन बाहिर नै रहे ।

लिभरपुलका मालिकहरुले कौटिन्होलाई बार्सिलोनामा बेच्न खोजिरहेका थिएनन् । तर हालै साउथह्याम्पटनबाट डिफेन्डर भर्जिल भ्यान डाइकलाई कीर्तिमानी ७५ मिलियन रकममा भित्राए पछि लिभरपुलका मालिकहरुले पनि कौटिन्होलाई उनको इच्छा अनुसार बार्सिलोना जान दिएको बताइएको छ ।

कुनै पनि ब्रिटिस क्लब संलग्न भएको यो सबैभन्दा ठूलो सम्झौता हो । यस सिजन लिभरपुलका लागि सबै प्रतियोगितामा १२ गोल गरिसकेका छन् । बार्सिलोना हाल स्पेनिस ला लिगाको पहिलो स्थानमा रहेको छ भने लिभरपुल प्रिमियर लिगको चौथो स्थानमा रहेको छ ।