लन्डन (एजेन्सी)– सकरेक्स फुटबल फाइनान्स १०० ले सार्वजनिक गरेको अध्ययन अनुसार इङ्लिस क्लब म्यानचेस्टर सिटी आर्थिक रूपमा सबैभन्दा बलियो क्लब रहेको देखाएको छ । आर्थिक शक्तिलाई मध्यनजर गर्दै फुटबल नेटवर्किंङ संस्था सकरेक्सले सिटीलाई आर्थिक रुपमा विश्वको शक्तिशाली क्लब ठहर गरेको छ ।

क्लबका खेलाडी, सम्पत्ति, आरक्षित नगद, मालिकहरुले थप लगानी गर्न सक्ने क्षमता र कुल ऋणलाई ध्यान दिँदै सकरेक्सले उक्त सुची तयार पारेको हो । सुचीमा अबुधाबी युनाइटेड ग्रुपले थप लगानी गर्न सक्ने क्षमताका कारण सिटी पहिलो स्थानमा रहेको प्रतिवेदनमा उल्लेख छ ।

त्यस्तै दोस्रो स्थानमा प्रिमियर लिगको अर्को क्लब क्लब आर्सनल छ । ट्रान्सफर विन्डोमा उचित मुनाफा गर्दै आएको कारण आर्सनल अन्य थुप्रै शक्तिशाली क्लब भन्दा माथि रहेको हो । त्यस्तै तेस्रो स्थानमा फ्रेन्च क्लब पेरिस सेन्ट जर्मेन (पिएसजी) र चौथोमा चिनिया क्लब गुन्जाओ एभरग्रिनेड रहेको छ ।

पाँचौ स्थानमा टोटेनह्याम, छैटौमा रियल म्याड्रिड र सातौमा म्यानचेस्टर युनाइटेड रहेको छ । युनाइटेडको ऋणका कारण टोटेन्ह्याम भन्दा पछि परेको रिपोर्टमा बताइएको छ ।आठौ स्थानमा इटालियन क्लब युभेन्टस छ ।

त्यस्तै मालिक रोमन अब्रामोबिचले ऋणमार्फत लगानी गरेको भनिएका कारण चेल्सी नवौं स्थानमा रहेको हो । बायर्न म्युनिख दशौँ स्थानमा छ । त्यो सुचिमा बार्सिलोना १३ औं स्थानमा छ । शीर्ष सयको सुचिमा ९ चिनिया र ५ अमेरिकी क्लब छन् ।