काठमाडौं (हाम्रो खेलकुद) – विभागीय दुई टोली त्रिभुवन आर्मी क्लब र नेपाल एपीएफ क्लब राखेप च्याम्पियनसिप अन्तर्गतको १६ औं महिला राष्ट्रिय फुटबल लिगको सुपर लिगमा प्रवेश गरेका छन् । लिग अन्तर्गत बुधबार भएको खेलमा आर्मीले मध्यपश्चिमलाई १२–० ले तथा एपीएफले पश्चिमाञ्चललाई १४–० ले पराजित गर्दै सुपर लिगमा स्थान बनाएका हुन् ।

सातदोबाटोस्थित एन्फा कम्प्लेक्सको खेल मैदानमा बुधबार भएको पहिलो खेलमा आर्मीले मध्यपश्चिमलाई १२–० को फराकिलो अन्तरले पराजित गर्दा सपना लामाले ५ तथा शर्मिला थापामगरले ४ गोल गरिन् । दीपा राईले २ तथा कप्तान कृष्णा खत्रीले एक गोल गरिन् ।

एकपक्षीय बनेको खेलमा आर्मीले खेलको चौथो मिनेटमा नै शर्मिला थापामगरको गोलबाट अग्रता लिएको थियो । ११ औं मिनेटमा कप्तान कृष्णा खत्रीले अग्रता दोब्बर पारिन् । शर्मिलाले २६ र ३५ औं मिनेटमा गोल गर्दै आफ्नो ह्याट्रिक पूरा गरिन् । खेलको ८० औं मिनेटमा उनले अर्काे गोल पनि थपिन् । त्यस्तै सपना लामाले ३८, ५३, ७६ र ८५ औं मिनेटमा गोल गरिन् । दीपा राईले २५ र २९ औं मिनेटमा गोल गरिकी थिइन् ।

लिग अन्तर्गत बुधबारै भएको अर्काे खेलमा एपीएफले पश्चिमाञ्चलमाथि १४–० को फराकिलो जित निकाल्यो । एपीएफको जितमा सावित्रा भण्डारी एक्लैले ८ गोल गरिन् । रेखा पौडेल, अनिता केसीले समान २ गोल गर्दा रेनुका नगरकोटी र अनिता बस्नेतले समान १ गोल गरिन् ।पश्चिमाञ्चलविरुद्ध ८ गोल गरेसँगै सावित्राले लिगमा आफ्नो गोल सङ्ख्या २० पुर्‍याएकी छिन् । सावित्राले मध्यपश्चिमविरुद्ध एक्लैले १२ गोल गरेकी थिईन् ।

जितपछि दुवै टोलीको समान दुई खेलबाट ६ अंक भएको छ, तर, गोल अन्तरमा एपीएफ समूहमा शीर्ष स्थानमा छ । यी दुईबीचको लिग चरणको अन्तिम खेलले नै समूह विजेता निर्धारण गर्नेछ । सो खेल शुक्रबार हुँदैछ ।