दिपक न्यौपाने
बुटबल – अखिल नेपाल फुटबल संघ (एन्फा) को केन्द्रिय नेतृत्व आफ्नै मातहत रहेको रुपन्देही जिल्ला फुटबल संघ प्रति अनुदार रहँदै आएको छ । अझ रुपन्देहीका अध्यक्ष दीर्घबहादुर (कुमार) केसी प्रति एन्फा नेतृत्व असन्तुष्ट रहँदै आएको थियो । अघिल्लो कार्यकालमा पनि केन्द्रिय नेतृत्वको चाहना विपरित निर्वाचित को अध्यक्षमा कुमार फेरि चार वर्षे कार्यकालको लागि सोमबार निर्वाचित भएका छन् ।

रुपन्देही जिल्ला फुटबल संघका निर्वाचित अध्यक्ष कुमार केसी ।

अहिले पनि एन्फाको केन्द्रिय नेतृत्व त्यसमा पनि संस्थापन भनिएको पक्ष उनी वाहेकको नेतृत्वको पक्षमा थियो । यहाँ सम्मकी एन्फाका पूर्व अध्यक्ष गणेश थापा जो फिफाबाट १० वर्ष प्रतिबन्धमा छन्, उनी समेत केसीलाई रुपन्देहीको नेतृत्वमा आउनबाट रोक्न लागि परेको खुलासा भएको छ । रुपन्देहीको निर्वाचनका प्रतिनिधिलाई उनले फोन गरेर कुमारलाई सहयोग नगर्न आग्रह गरेको अडियो टेप सार्वजनिक भएको छ ।

जबकी थापा १० वर्ष सम्म कुनै पनि फुटबल गतिविधिमा संलग्न हुन नपाउने गरि प्रतिबन्धमा छन् । थापाले अडियो टेपमा केसीले राजनीतिक आस्थाका आधारमा आफ्नो विपक्षमा उभिएको बताएका छन् । तीन वर्षअघि एन्फाकै तत्कालिन उपाध्यक्ष कर्माछिरिङ शेर्पाको नेतृत्वमा चलेको शुद्धिकरण अभियानका केसी समर्थक थिए । त्यहाँ देखि नै एन्फा संस्थापन पक्ष केसीसँग रुष्ट रहँदै आएको छ ।

एन्फाका मनार्थ उपाध्यक्ष हरि श्रेष्ठ र केसीबीचको तिक्तताका कारण त्यसले रुपन्देही फुटबल विकासमा पनि असर पर्दै आएको छ । एन्फा आफैले स्थापना गरेको बुटबलको एकेडेमी र रुपन्देही संघले गर्ने कुनै पनि कार्यक्रममा एन्फाले साथ दिन छाडेको छ ।

यस्तोमा चार वर्षे कार्यकालका लागि भएको निर्वाचनमा केसी १९ मध्ये १४ मत पाएर विजयी भए । उनका प्रतिद्वन्द्वी ऋषिराम ज्ञवालीले ५ मत प्राप्त गरे । कायसमितिमा केसीकै प्यानल विजयी भएको थियो । ३ उपाध्यक्षमा ५ जना उम्मेदवार मध्ये मकेश कुँवर (१८ मत), भूपेन्द्रबहादुर (हरि) क्षत्री (१४), खेमराज (मुन्ना) गुरुङ (१४) निर्वाचित भए ।

१० जना उम्मेदवार मध्ये ८ जना सदस्यमा होम गलामी (१९), मनोजकुमार थापा (१९) सोमबहादुर (सुरज) थापा (१९), जक्तबहादुर थापा (१८), पदमबहादुर थापा (१८), प्रेम राना (१६), इशान भण्डारी (१५), शंकर मल्लाह (१४) विजयी भएका छन् ।

मोतीकला गुरुङ महिला सदस्यमा निर्विरोध भइन् । कार्यसमितिले अन्य पदाधिकारी मनोनित गर्नेछ । जिल्ला संघमा २० क्लब आबद्ध छन् । प्रतिनिधि छनोटमा विवाद परेपछि इन्टर स्पोर्ट्स क्लबले निर्वाचनमा भाग लिन पाएन ।

रुपन्देही जिल्ला फुटबल संघका निर्वाचित पदाधिकारी एवंम् सदस्यहरु ।

रोक्नका लागि अनेक प्रयास भएपनि आफ्नो टिम जित्न सफल भएको उल्लेख गर्दै केसीले हाम्रो खेलकुद डटकमसँग भने,’निर्वाचिन सकिएपछि त्यी सबै कुरा त्यहि टुंगिएका छन् । अब हामी फेरि पनि जिल्लाको फुटबल विकासमा एकजुट भएर लाग्नु पर्दछ । निर्वाचनबाट एउटा परिणाम आइसकेकोले अब त्यो चरण पुरा भएको छ । हामी सबैलाई साथमा लिएर अघि बढ्नेछौं । ‘

केसीले उमेर समूहका खेलाडी उत्पादन गर्दै जाने र एन्फा टेक्निकल सेन्टरलाई अझै व्यवस्थित रुपमा सञ्चालन गर्ने योजना रहेको बताएका छन् । उनको नेतृत्वमा जिल्ला संघले एकेडेमी सञ्चालन गर्दै आएको छ भने केही वर्ष स्थागित तिलोत्तमा गोल्ड कपले पनि निरन्तरता पाउँदै आएको छ । केसीका अनुसार यसपटकको तिलोत्तमा गोल्ड कप फागुनमा हुनेछ ।

केन्द्रिय निर्वाचन अघि एन्फाको जिल्ला निर्वाचन हरु भइरहेको छन् । एन्फाले पुस ५ देखि माघ ५ गते सम्म भित्र निर्वाचन गरि सक्न जिल्लालाई निर्देशन दिएको छ । चार वर्षे कार्यकालका लागि एन्फाको १७ सदस्यीय कार्यसमितिको निर्वाचन चैत १४ गते हुँदैछ ।