काठमाडौं (हाम्रा खेलकुद) – राखेप च्याम्पियनसिप अन्र्तगतको १६ औं महिला राष्ट्रिय फुटबल फुटबल विभागीय नेपाल पुलिस क्लब र मध्यमाञ्चल विजयी भएका छन् ।

सातदोबाटोस्थित एन्फा कम्प्लेक्सको खेल मैदानमा मंगलबार भएको पहिलो खेलमा पुलिसले सुदूरपश्चिमाथि २–१ को कठिन जित निकालेको हो । लिगमा पुलिसको यो लगातार दोस्रो जित हो । प्रतिस्पर्धात्मक बनेको खेलमा पुलिसले एक गोलले पछि परेको स्थिति उल्ट्याउदै लिगमा लगातार दोस्रो जित निकालेको हो ।

सुदूरपश्चिमका चन्द्रा भण्डारीले १६ औं मिनेटमा गोल गर्दै टिमलाई अग्रता दिलाएका थिए । तर, दोस्रो हाफमा उत्कृष्ट प्रदर्शन गरेको पुलिस खेलमा फर्कदै दुई गोल गर्न सफल भयो । पुलिसका लागि ५८ औं मिनेटमा निरु थापाले बराबरी गोल गर्दा त्यसको आठ मिनेटपछि निर्मला उपाध्ययले गोल गर्दै टिमलाई अग्रता दिलाए । अन्तत त्यही गोल नै पुलिसको जितमा पर्याप्त बन्यो । यसअघि खेलको तेस्रो मिनेटमा नै पुलिसले अग्रता लिने मौका खेर फालेको थियो । तेस्रो मिनेटमा प्राप्त पेनाल्टीमा पुलिसका कप्तान घिम कुमारी गुरुङको प्रहार सुदूरका गोलरक्षक उषानाथले रोकेका थिए ।

जितपछि पुलिसका प्रशिक्षक सन्जिप जोशीले दोस्रो हाफमा खेलाडीबीच तालमेल मिल्दा जित हात पार्न सकिएको बताए । ‘विपक्षी टिमले पहिलो हाफमा हामीले भन्दा राम्रो खेल्यो । दोस्रो हाफमा हामीले राम्रो खेल्दै गोल गर्न सक्यौं ।’ प्रशिक्षक जोशीले भने, ‘सुदूरपश्चिमको टोली एकेडेमी जस्तै हो । हामीलाई थाहा छ उनीहरुले राम्रो खेलिरहेका छन् । उनीहरुको प्रदर्शनलाई सम्मान गर्नुपर्छ ।’
यता पराजित टिमका प्रशिक्षक डवल बहादुर थापाले टिमको प्रदर्शनमा आफु सन्तुष्ट रहेको बताए । उनले टिम सुपर लिगमा प्रवेश गर्नेमा ढुक्क रहेको बताए ।
महिला लिग अन्र्तगतकै अर्काे खेलमा मध्यमाञ्चलले पूर्वाञ्चललाई ४–० ले पराजित गर्दै लिगमा पहिलो जित निकालेको छ । मध्यमाञ्चल पहिलो खेलमा पुलिससँग ६–२ ले पराजित भएको थियो ।
मध्यमाञ्चलाई लिगमा पहिलो जित दिलाउन रश्मी कुमारी घिसिङले २ तथा कप्तान मेनुका नगरकोटी र सविता रानामगरले समान १–१ गोल गरिन् ।
च्याम्पियनसिपमा ५ विकास क्षेत्रसहित ३ विभागीय टोली गरी ८ टिमको सहभागिता रहेको छ । सहभागी ८ टिमलाई दुई समूहमा विभाजन गरिएको छ । हरेक समूहका शीर्ष दुई टोली सुपर लिगका लागि छानिनेछन् । सुपर लिगमा पनि शीर्षस्थानमा रहने टिम लिगको च्याम्पियन बन्नेछ ।
लिगको विजेताले २ लाख रुपैया प्राप्त गर्नेछ । उपविजेताले १ लाख प्राप्त तथा तेस्रो हुनेले ५० हजार रुपैया प्राप्त गर्नेछ । विधागत तर्फका स्ट्राइकर, मिडफिल्डर, डिफेन्डर, गोलरक्षक र प्रशिक्षकले जनही २५ हजार रुपैया प्राप्त गर्नेछन् ।

लिग अन्र्तगत बुधबार पनि दुई खेल हुदैछ । पहिलो खेलमा त्रिभुवन आर्मी क्लबले मध्यपश्चिमाञ्चलको तथा दोस्रो खेलमा नेपाल एपीएफ क्लब र पश्चिमाञ्चलबीच खेल हुनेछ ।