हेटौंडा (हाम्रो खेलकुद) – सुमन भोम्जन स्मृति खेलकुद प्रतिष्ठानको आयोजनामा तेस्रो हेटौंडा अन्तराष्ट्रिय गोल्डकप फुटबल प्रतियोगिता फागुन पहिलो साताबाट हुने भएको छ । आयोजकले यसअघि गत कात्तिकमा पत्रकार सम्मेलनमार्फत नै प्रतियोगिता पुस ८ गतेबाट १५ गतेसम्म हुने जानकारी गराएको थियो । तर, प्राविधिक कारण प्रतियोगिता फागुनमा सार्नु परेको प्रतिष्ठानका अध्यक्ष भेष खड्गीले बताए ।

तेस्रो संस्करणको प्रतियोगिता अब फागुन ५ गतेबाट १२ गतेसम्म हेटौंडामा हुने भएको छ । प्रतियोगितामा ‘ए’ डिभिजनका टोली र अन्य टोलीको सहभागिता रहने बताइएको छ । प्रतियोगिता यसअघि जस्तै हेटौंडाको वन विज्ञान सस्थानको मैदानमा हुने बताइएको छ ।

पत्रकार सम्मेलनमा अध्यक्ष खड्गीले प्रतियोगितामा ए डिभिजन टोली लक्ष्मी हुन्डाई मनाङ मस्याङ्दी, रुस्लान थ्री स्टार, नेपाल एपिएफको सहभागिता रहनेछ । त्यस्तै हेटौंडाको विजय युथ, सुदूरपश्चिम ११, झापा ११ र पोखराको सहारा क्लबले पनि प्रतियोगितामा भाग लिनेछन् ।

प्रतियोगितामा कुल ६० लाख लागत लाग्ने अनुमान रहेको बताउँदै उनले प्रतियोगितामा सर्वोत्कृष्ट खेलाडीलाई नगद २५ हजार तथा विधागत उत्कृष्ट खेलाडीलाई १० हजार र म्यान अफ द म्याचमा ५ हजारको पुरस्कार दिइने बताए । प्रतिष्ठानले आउँदो पुस २५ र २६ गते हेटौंडामा खेलकुद पत्रकारिता तालिम आयोजना गर्ने पनि सोही अवसरमा जानकारी दिइयो ।

२०७२ वैशाख १२ को विनाकारी भूकम्पमा परि ज्यान गुमाएका खेलकुद पत्रकार सुमन भोम्जनको नाममा प्रतिष्ठान स्थापना गरिएको हो । नेपाल खेलकुद पत्रकार मञ्च मकवानपुर समन्वय शाखाका सस्थापक अध्यक्ष समेत रहेका भोम्जन हेटौडामा जन्मेर खेलकुद पत्रकारितामा सक्रिय भएका थिए । गोरखापत्रमा कार्यरत हुँदा उनको मृत्यु भएको थियो ।