काठमाडौं (हाम्रो खेलकुद) – विभागिय टोली नेपाल पुलिस क्लब र सुदूरपश्चिमाञ्चलले फराकिलो जितसहित राखेप च्याम्पियनसिप महिला फुटबल प्रतियोगिताको सुरुआत गरेका छन् ।

सातदोबाटोस्थित एन्फा कम्प्लेक्समा भएको खेलमा पुलिसले मध्यमाञ्चलमाथि ६–२ को फराकिलो जित हासिल गर्यो । टोलीको जितमा निर्मला विकेले ह्याट्रिकसहित ४ गोल र अमृता जैशी र कप्तान घिम कुमार गुरुङले समान २ गोल गरे ।

एकपक्षिय खेलको ११ औं मिनेटमा निर्मलाको गोलबाट पुलिस अग्रता लिएको थियो । १३ औं मिनेटमा दोस्रो गोल गरेका निर्मलाले ३६ औं मिनेटमा ह्याट्रिक पुरा गरिन् । त्यसअघि अमृताले १९ औं मिनेटमा गरेकी थिइन् । २६ औं मिनेटमा मध्यमाञ्चलकी सविता राना मगरले गोल गर्दै गोल अन्तर घटाउने प्रयास गरिन् ।

तर, १० मिनेटपछि निर्मलाले अर्को गोल थपिन् । ७२ औं मिनेटमा घिमले पेनाल्टीमा गोल गरिन् । खेल सकिन १ मिनेट बाँकी रहँदा मिथिला कुशवारले गोल गर्दै गोल अन्तर ६–२ मा झारेपनि हार टार्न सकेन । पुलिसका प्रशिक्षक सन्जिव जोशीले मध्यमाञ्चलमाथि प्रभावशाली जित निकाल्नु टिमको लागि सुखद पक्ष रहेको बताए ।

‘मध्यमाञ्चल प्रतियोगितामा बलियो टोली हो । उनीहरुले पहिलो खेलमा ६ गोल खान पुगे ’ प्रशिक्षक जोशीले भने, ‘बढी गोल खायो भन्दैमा उनीहरुलाई कमजोर भन्न मिल्दैन । उनीहरुमा खेलमा फर्कन सक्ने क्षमता छ ।’

पराजित टिमका प्रशिक्षक नुरराज काफ्लेले खेलाडीको प्रदर्शनबाट आफु सन्तुष्ट रहेको बताए । ‘म खेलाडीको प्रदर्शनबाट खुशी छु । उनीहरुले बलियो टिम पुलिससँग राम्रो फुटबल खेले ’ उनले भने, ‘बलियो टिमसँग खेलेर २ गोल गर्न सक्नु पनि टिमको लागि सुखद पक्ष हो ।’

आजको अर्को खेलमा सुदुरपश्चिमले पूर्वाञ्चलमाथि ४–० को जित निकालेको थियो । चन्द्रा भण्डारी र श्रीषा कार्कीले समान २ गोल गरे । चन्द्राको गोलबाट नवौं मिनेटमा अग्रता लिएको सुदुरका लागि उनले ३७ औं मिनेटमा अर्को गोल थपरिन् । श्रीषाले ८२ र ८९ औं मिनेटमा गोल गर्दै टोलीको जित निश्चित गरिन् ।

युवा तथा खेलकुद मन्त्री राजन कुमार केसीले फिफा रेफ्री तथा खेलको म्याच रेफ्री अस्मिता मानन्धरलाई बल हस्तान्तरण गर्दै प्रतियोगिताको उद्घाटन गरे । पाँच विकास क्षेत्र र तीन विभागिय टोली गरि प्रतियोगितामा ८ टोलीको सहभागिता रहेको छ ।