लन्डन (एजेन्सी)– चेल्सीका प्रशिक्षक एन्टोनियो कोन्टेले टोलीका स्ट्राइकर इडन हाजार्डलाई पनि रियल म्याड्रिका क्रिस्टियानो रोनाल्डो र बार्सिलोनाका लियोनल मेस्सीसँगै एउटै तहमा राख्न सकिने उल्लेख गर्दै तर, त्यसका लागि उनले बढी गोल गर्नु पर्ने बताएका छन् ।

हाजार्डले यो सिजन १४ खेलमा मात्र ४ गोल गरेका छन् । बेल्जियमबाट खेल्दा गोलिगाठामा चोट लागेपछि उनले सिजनको सुरुवातका केहि महिना मैदान बाहिरि रहनु परेको थियो ।

बेल्जियमका सुपरस्टारको हाजार्ड अघिल्लो सिजन भने उत्कृष्ट रहेको थियो । चेल्सीलाई प्रिमियर लिग उपाधि दिलाउने क्रममा उनले १६ गोल गरेका थिए । यो वर्षको बालोन डि ओर अवार्डको उपाधि दौडमा उनी १९ औं नम्बरमा थिए । अवार्ड रोनाल्डोले पाँचौं पटक जितेका थिए ।

भविष्यमा हाजार्डले बालोन डी ओर जित्ने सम्भावना रहेको उल्लेख गर्दै कोन्टेले भने, ‘यदि आफुलाई माथिल्लो स्तरमा देख्न चाहने हो भने जति सक्दो बढी गोल गर्नुपर्दछ । त्यसका लागि उनले सुधार गर्नुपर्ने हुन्छ ।’

हाजार्डका भूमिकाका बारेमा कोन्टेले थपे, ‘कोही स्ट्राइकर वा १० नम्बरको जर्सी लगाउछ भने बढी गोल गर्ने पर्ने हुन्छ । मलाई लाग्छ उनीमा सुधार गर्ने थ्रुपै ठाँउ छ । यो पनि विसर्न हुन्नकी उनी रोनाल्डो र मेस्सीभन्दा कान्छा छन् ।’ हाजार्ड रियल जाने विषय पछिल्लो समय निकै चर्चामा छ । उनी जनवरी ट्रान्फरमा स्पेन पुग्ने अनुमान गर्ने पनि धेरै छन् ।