दिपक बोहोरा

फिदिम – फिदिममा जारी नवौं रुस्लान फाल्गुनन्द गोल्डकप प्रतियोगिताको भोली हुने फाइनल खेलका लागी मोरङ ११ र सुनसरी ११ तयार रहेका बताएका छन् ।

फाइनल खेलको अधिल्लो दिन आयोजक फिदिम स्पोर्टिङ क्लबले आयोजना गरेको प्रिम्याच कन्फ्रेन्समा बोल्दै दुवै टिमका प्रशिक्षकहरुले फाइनलको लागी आफू तयार रहेको बताएका हुन् । फाइनल खेल भोली २ बजे फिदिम माविको खेल मैदानमा हुनेछ ।

प्रिम्याच कन्फ्रेन्समा पत्रकारहरुसँग कुरा गर्दै मोरङका प्रशिक्षक मनिश तिम्सीनाले आक्रमक फुटबल खेल्दै उपाधि जित्ने बताएका छन् । यता सुनसरीका प्रशिक्षक श्याम मान्धरले रक्षात्मक खेल्दै काउन्टर एट्याकमा गोल गर्ने आफूहरुको रणनीति सफल भइरहेको हुँदा भोलीको खेलमा पनि सोहि शैलीमा खेल्ने बताएका छन् ।

पुस ७ गतेबाट फिदिममा जारी रहेको प्रतियोगिताको उपाधिको लागी मोरङ ११ र सुनसरी ११ बीच प्रस्तिपर्धा हुँदैछ । सुनसरीले आफ्नो पहिलो खेलमा ए डिभिजन क्लब डिबाइ ब्वाइज युनियनलाई ३–० ले, क्वाटरफाइनलमा अर्को ए डिभिजनको विभागीय टिम एपिएप लाई ३–० ले र सेमिफाइनलमा अग्नी रुपन्देहि ११ लाई ३–१ ले हराउँदै फाइनलसम्मको यात्रा तय गरेको थियो ।

मोरङ ११ ले क्वाटरफाइनलमा त्रिभुवन आर्मी क्लबलाई ट्राइबेकरमा ४–२ ले र सेमिफाइनलमा साविक विजेता समेत रहेको बिर्ता युनाइटेडलाई सडनडेथमा ६–५ ले हराउँदै फाइनल प्रवेश गरेको हो ।

प्रतियोगिताको विजेताले उपाधि सहित नगद ३ लाख प्राप्त गर्ने छ भने उपविजेताले नगद २ लाख प्राप्त गर्ने छ । हरेक दिनको म्यान अफ दि म्याच तथा प्रतियोगिताको उत्कृष्ट गोलकिपर रक्षक, प्रशिक्षक, मिडफिल्डर र फरवार्डले समान नगद १० हजार प्राप्त गर्ने छन् । प्रतियोगिताको सर्वाेकृष्ट खेलाडीले मोटरसाइकल प्राप्त गर्ने छ ।