लन्डन (एजेन्सी)– चेल्सीका स्टार स्ट्राइकर इडन हाजार्डले चेल्सीसँगको नयाँ सम्झौता गर्न अस्वीकार गरेका छन् । ला लिगाको सफल टोली रियाल म्याड्रिड वा प्रिमियर लिग टोली म्यानचेस्टर युनाइटेड जाने सम्भावनालाई मध्यनजर गर्दै उनले सम्झौता नगरेको बताइएको छ ।

पछिल्लो केहि वर्षयता हजार्ड रियल जाने चर्चा चलेको थियो । बेल्जियन हाजार्ड आफैले पनि पटक पटक रियल जाने इच्छा जाहेर गरेका थिए । २६ वर्षे उनको चेल्सीसँगको सम्झौता सन् २०२० सम्म रहेको छ । यदि राम्रो प्रस्ताव आएको खण्डमा भने उनी थप सम्झौता लम्बाउने पक्षमा छैनन् ।

युनाइटेडले पनि उनलाई भित्राउने इच्छा देखाइरहेको बताइएको छ । उनी पूर्व प्रशिक्षक जोसे माउरिन्होको नजरमा पनि परेका खेलाडी हुन् । यद्दपि चेल्सी चिरप्रतिद्वन्दि युनाइटेडलाई हजार्ड बेच्ने पक्षमा भने छैन । हाजार्ड रियलका प्रशिक्षक जिनेदिन जिदानको प्रशंसक हुन् । उनले जिदानसँग काम गर्न चाहेको पनि यसअघि बताइसकेका छन् ।

इडनका पिता थेएरीले चेल्सीसँगको सम्झौताका विषयमा उल्लेख गर्दै रियल जाने सम्भावनाको पर्खाइमा रहेको संकेत गरेका छन् । ‘उनले सम्झौता प्रस्ताव अस्वीकार गरेका छन्,’ उनले भने, ‘तर, रियलसँग पनि कुनै सम्झौता भएको छैन ।’

ला लिगामा यसपटक रियलको सुरुआत राम्रो हुन सकेको छैन । शीर्षस्थानको बार्सिलोना भन्दा रियल १४ अंकले पछाडि रहेको छ । यस्तोमा जिदानले हाजार्ड भित्राउने विषयमा सोच्न सक्ने अनुमान गरिएको छ ।