लन्डन (एजेन्सी)– रियल म्याड्रिड तथा ब्राजिलका लेजेन्ड स्ट्राइकर रोनाल्डोले लिभरपुलका मिडफिल्डर फिलिपे कौटिन्होलाई बार्सिलोना नजान सुझाव दिएका छन् । 

बार्सिलोनाले समर ट्रान्सफर विन्डोदेखि पटक पटक कौटिन्होलाई भित्राउने प्रयास गरेपनि लिभरपुलले स्पेनिस क्लबको प्रस्ताव अस्वीकार गर्दै आएको छ । २५ वर्षे ब्राजिलियन मिडफिल्डरले सार्वजनिक रूपमा बार्सिलोना जाने इच्छा लिभरपुल सामु राखेपनि क्लब उनलाई कुनै पनि हालतमा गुमाउने पक्षमा छैन ।

जनवरी ट्रान्सफर नजिकिदै गर्दा बार्सिलोनाले फेरि अर्को प्रयास गर्ने निश्चित रहँदा ब्राजिलका महान खेलाडी रोनाल्डोले कौटिन्होलाई बार्सिलोना नजान सुझाव दिएका हुन् । एस्पोर्टे इन्टराटिभोसँगको अन्तर्वार्तामा रोनाल्डोले बार्सिलोनामा ब्राजिलियन खेलाडीलाई राम्रो व्यवहार नहुने तर रियलमा सम्मानजनक व्यवहार पाउने बताए ।

‘बार्सिलोनामा राम्रो प्रदर्शन गरेपनि म रियलमा धेरै खुशी थिए ‘, बार्सिलोना र रियल दुवै क्लबबाट खेलेका ४१ वर्षे रोनाल्डोले भने , ‘बार्सिलोनामा ब्राजिलियन खेलाडीलाई जहिलै नराम्रो व्यवहार गरिन्छ । नेयमार , रोनाल्डिन्हो, रोमारियो र म आफै यसको उदाहरण छौं । हामीले जति राम्रो खेलेपनि अन्त्यमा जहिलै नराम्रो व्यवहार हुन्थ्यो ।’

बार्सिलोनासँग १ सिजन मात्र बिताएका रोनाल्डो निकै प्रभावकारी रहे । उनले बार्सिलोनाबाट ३७ खेलमा ३४ गोल गरेपछि इन्टर मिलान हुँदै पुनः रियल पुगेका थिए । रियलमा पाँच वर्ष रहँदा उनले १ सय २७ खेलमा ८३ गोल गरेका थिए ।