दिपक बोहोरा
पाँचथर– सुनसरी ११ फिदिममा जारी नवौं रुस्लान फाल्गुनन्द गोल्ड कप फुटबल प्रतियोगिताको फाइनलमा पुगेको छ । अग्नी रुपन्देही ११ लाई आज ३–१ ले हराउँदै सुनसरी उपाधि नजिक पुगेको हो । सुनसरीले आइतबार हुने फाइनलमा साविक विजेता विर्ता युनाइटेड वा मोरङसँग फाइनल खेल्नेछ । दोस्रो सेमिफाइनल भोली हुनेछ ।

फिदिम माविमा जारी प्रतियोगिताको पहिलो सेमिफाइनलमा सुनसनरीले १४ औं मिनेटमा तीर्थ बस्नेतको गोलबाट अग्रता लिएको थियो । विपक्षीको कमजोर रक्षापक्तिको फाइदा उठाउँदै तीर्थले गोल गरेका हुन् । ७३ औं मिनेटमा सौजन याख्खाले गोल गर्दै अन्तरलाई दोब्बर पारे ।

हेमन्त थापाको पासमा सौजनले गोल गरेका हुन् । खेल सकिन ८ मिनेट बाँकी रहँदा हेमन्त आफैले गोल गर्दै अग्रतालाई थप फराकिलो पारे । इन्जुरी समयमा रुपन्देहीका छिरिङ गुरुङले गोल गरे पनि त्यो सान्त्वनामा मात्र सिमित रह्यो । ९ गोल गरिसकेको सुनसरीले प्रतियोगितामा खाएको त्यो पहिलो गोल हो ।

सुनसरीका प्रशिक्षक श्याम मानन्धरले रक्षात्मक खेल्दै काउन्टर एट्याकमा गोल गर्ने रणनीति सफल भएको बताए । रुपन्देहीका प्रशिक्षक दयाराम सापकोटाले खेलाडीमा तालमेल नमिल्दा हार्नु परेको बताए । सुनसरीका बिष्णु सुनुबार म्यान अफ दि म्याच घोषित भए र उनले १० हजार रुपैयाँ प्राप्त गरे ।

फाल्गुनन्द गोल्ड कपको विजेताले उपाधि सहित ३ लाख, दोस्रो हुने टोलीले २ लाख रुपैयाँ प्राप्त गर्नेछन् । सवोत्कृष्ट खेलाडीले मोटरसाइकल प्राप्त गर्ने प्रतियोगिताका उत्कृष्ट गोलकिपर, रक्षक , मिडफिल्ड, फरवार्ड र प्रशिक्षकले समान १० हजार रुपैयाँ पाउनेछन् ।

फाल्गुनन्द गोल्ड कपमा शुक्रबार दोस्रो सेमिफाइनल
विर्ता युनाइटेडविरुद्ध मोरङ ११