पेरिस (एजेन्सी)– मोनाकोबाट लोनमा यो सिजनको सुरुआतमा स्ट्राइकर केलियन बाप्पे पेरिस सेन्ट जर्मेन (पिएसजी) पुगेका थिए । पिएसजी पुग्नुअघि स्पेनिस क्लब रियल म्याड्रिडले उनी प्रति गम्भिर चासो देखाए पनि अब त्यहाँ जाने सम्भावना नरहेको बाप्पेले बताएका छन् ।

केलियन बाप्पे

नेयमार र इडिन्सन काभानीसँग निकै राम्रो तालमेल बनाएका १९ वर्षे बाप्पले पिएसजीमा उत्कृष्ट सुरुआत गरेका छन् । रियलका विषयमा थप प्रष्ट पार्दै उनले रियल कुनै बेला आफ्नो सपनाको क्लब रहेको र अब क्लबले पनि उनी प्रति चासो नराखेको बताएका छन् ।

स्पेनिस सञ्चारमाध्यम मार्सासँग कुराकानी गर्दै बाप्पेले पिएसजी जाने समयमा रियलसँग कुराकानी अघि बढेको उल्लेख गर्दै भनेका छन्, ‘हो रियल र हाम्राबीचमा छलफल भएको थियो । अहिले मेरा लागि रियल विगत भइसकेको छ । मैले नयाँ यात्रा सुरु गरेको छु र त्यसप्रति आशावादी छु ।’

बाप्पेतर्फको अहिले रुची नराखेपनि विभिन्न सञ्चारमाध्यमका अनुसार रियल सिजनको अन्त्यपछि नेयमारलाई भित्राउने योजनामा रहेको छ । तर, नेयमार रियल पुग्नका लागि धेरै खाले विषयहरु टुंगिनुपर्ने हुन्छ । बार्सिलोनाबाट पिएसजी पुगेपछि उच्च प्रदर्शन गरेपनि नेयमार क्लबमा सन्तुष्ट नरहेको बेला बेला सञ्चारमाध्यमहरुले उल्लेख गरेका छन् ।

बाप्पेको रियल नजाने निर्णयलाई आर्सनलका पूर्व महान खेलाडी रोर्बेट पिरेसले खुलेर समर्थन गरेका छन् । मलाई लाग्छ बाप्पेले जुन निर्णय लिए त्यो सहि छ । किनकी उनी फ्रान्समै रहन जुरुरी थियो, उनले भने, ‘उनी निकै युवा छन् । उनले पिएसजीमा रहेर आफुलाई अब्बल प्रमाणित गर्नुपर्दैछ । साच्चै त्यो सहि निर्णय थियो । ‘

पिरेसले अगाडि थपे, ‘मलाई थाहा छ रियल र त्यसका प्रशिक्षक जिनेदिन जिदान उनलाई लान चाहन्थे । हुन सक्छ कुनै दिन उनी त्यहाँ पुग्लान् पनि । तर म दोहोराएर भन्छु बाप्पे र उनको परिवारका लागि उनी फ्रान्समा रहनु महत्वपूर्ण थियो ।’