दिपक बोहोरा
पाँचथर– अग्नी रुपन्देही ११ फिदिममा जारी नवौं फाल्गुनन्द गोल्ड कप फुटबल प्रतियोगिताको सेमिफाइनलमा पुगेको छ । भारतको खर्साङ फुटबल क्लब दार्जिलिङलाई ३–१ ले हराउँदै रुपन्देही अन्तिम चारमा पुगेको हो । अग्नी रुपन्देहीले फाइनल प्रवेशका लागि शुक्रबार सुनसनरी ११ को सामना गर्नेछ ।

रुपन्देहीको जितमा रजिन सुब्बाले २ र सुनिल खड्काले १ गोल गरे । १९ औं मिनेटमा सुनिलको गोलबाट रुपन्देहीले अग्रता लिएको थियो । खर्साङका गोलकिपर अगाडि बढेको अवस्थामा खाली पोष्टमा सुनिलले गोल गरेका थिए । रजिनले २९ औं मिनेटमा गोल गर्दै अग्रतालाई दोब्बर पारे । सुनिलको क्रसमा रजिनले हेडमार्फत गोल गरेका थिए ।

खेलको ३५ औं मिनेटमा खर्साङका प्रशान्त गुरुङले कर्नरबाट आएको बलमा गोल गर्दै अग्रतालाई कम गराए । तर ६३ औं मिनेटमा सुनिलले गोल गरेपछि रुपन्देही खेल जित्दै अघि बढेको थियो । पहिलो हाफमा प्राप्त केहि मौका गुमाउँदा पाहुना टोली पहिलो खेलबाट घर फर्केको छ ।

रुपन्देहीका कप्तान दीलिप क्षेत्रले खेल जिते पनि टोलीले सोचे अनुरुपको प्रदर्शन गर्न नसकेको बताए । खर्साङका प्रशिक्षक अबिन क्षेत्रीले अवसर सदुपयोग गर्न नसक्दा हार्नु परेको जनाए । रुपन्देहीका छिरिङ गुरुङ म्यान अफ दि म्यान अफ दि म्याच घोषित भए र उनले १० हजार रुपैयाँ प्राप्त गरे ।

फिदिम स्पोर्टस क्लबले आयोजना गरेको फाल्गुनन्द गोल्ड कपको विजेताले उपाधि सहित ३ लाख, दोस्रो हुने टोलीले २ लाख रुपैयाँ प्राप्त गर्नेछन् । सवोत्कृष्ट खेलाडीले मोटरसाइकल प्राप्त गर्ने प्रतियोगिताका उत्कृष्ट गोलकिपर, रक्षक , मिडफिल्ड, फरवार्ड र प्रशिक्षकले समान १० हजार रुपैयाँ पाउनेछन् ।

फाल्गुनन्द गोल्डकपमा बुधबार हुने खेल
त्रिभुवन आर्मीविरुद्ध मोरङ ११