म्याड्रिड (एजेन्सी)– फ्रान्सेली र आर्सनलका हस्ती थिएरी हेनरीले जिनेदिन जिदानलाई रियल म्याड्रिडले बर्खास्त गर्छ भन्ने चर्चा गर्नु हास्यास्पद भएको बताएका छन् । रियल शनिबार भएको एल क्लासिकोमा बार्सिलोनासँग ३–० को हार बेहोरेको थियो ।

त्यो हार पछि शीर्षस्थानको बार्सिलोना र चौथो स्थानको रियलबीच १४ अंकको अन्तर भएको छ । अब रियललाई ला लिगाको उपाधि रक्षा गर्न असम्भव जस्तै देखिएको छ । यसपटकको ला लिगामा रियलले राम्रो सुरुआत गर्न सकेको छैन । अंक तालिकाको चौथो स्थानमा रहेपनि केहि दिन अघि मात्र रियलले क्लब विश्व कपको उपाधि जितेको थियो ।

सन् १९९८ को विश्व कप र २००० मा युरो कप जित्दा जिदानसँगै फ्रान्सेली टोलीमा रहेका हेनरीले मान्छेहरुको स्मरणशक्ति कमजोर रहेको टिप्पणी गर्दै जिदानको उपलब्धीलाई बिर्सेकोमा गुनासो गरेका छन् । ‘जिदानले जे गरेका छन् । त्यसका वावजुद पनि उनी बर्खास्त हुन्छन् भन्नु मेरो लागि हास्यास्पद हो । अझै पनि चुनौति पेश गर्ने सम्भावना छ,’ उनले भने, ‘कमजोर प्रदर्शन हुँदा प्रश्न उठ्नु स्वभाविक हो । तर उनीले जे गरेका छन्, त्यो निकै ठूलो उपलब्धी हो ।’

समर्थकको अपेक्षा अनुसार अहिले रियलले खेल्न नसकेको स्वीकार्दै हेनरीले भने तर पनि टोलीले जिति रहेको छ । जिदानलाई प्रशिक्षणमा निपुण मानिन्छ । उनले थपे, ‘उनले लगातार च्याम्पियन्स लिग उपाधि दिलाएका छन् । अरु पनि सफलता प्राप्त गरेका छन् । अहिले लिगको आधा मात्र भएको छ । अहिले नै खराब गरे भन्ने समय भएको छैन ।’

४५ वर्षे जिदान फुटबल इतिहासका सफल फुटबल मध्येका एक मानिन्छन् । उनले रियल सम्हालेयता १ सय १६ खेलमा टोलीलाई ८४ खेल जिताएका छन् । अब उनको टोलीले कोपा डेल रेको अन्तिम १६ को पहिलो लेगमा नुमानसियाको सामना गर्दैछ ।