लण्डन (एजेन्सी) – प्रिमियर लिगको बक्सिङ डेको खेल अन्तर्गत आज तालिकाको तेस्रो स्थानमा रहेको चेल्सी ब्राइटनसँग भिड्दै छ । चेल्सीको घरेलु मैदानमा खेलिने सो खेल नेपाली समय अनुसार ८.४५ बजे सुरु हुने छ ।

क्रिस्मसको अर्को दिन अर्थात् बक्सिङ डेमा एभर्टनसँग खेलेको गोलरहित बराबरीलाई बिर्सँदै चेल्सीले सुधारिएको प्रदर्शन गर्ने अपेक्षा राख्ने छ । ब्राइटनले भने वाटफोर्डमाथि १-० को महत्त्वपूर्ण जित दर्ता गरेको थियो ।

भ्रमणकारी टोली ब्राइटन सो लयलाई निरन्तरता दिन मैदानमा उत्रिने छ ।चेल्सीका लागि मुख्य स्ट्राइकर एल्भारो मोराटा प्रतिबन्धपछि टोलीमा फर्किने छन् । त्यस्तै सेस्क फ्याब्रिग्यास र ड्यानी ड्रिन्कवाटरले पनि टोलीमा स्थान बनाउने देखिन्छ । यस सिजन यी दुई बीच भएको भिडन्तमा ब्राइटनले ३-१ ले बाजी मारेको थियो ।

त्यस्तै आजको पहिलो खेल टोटनह्याम र साउथह्याम्पटन बीच ६.१५ बजे सुरु हुने छ । साउथह्याम्पटनका मुख्य स्ट्राइकर चार्ली अष्टिन घाइते भएका छन् । शनिबार बर्नलीलाई ३-० ले हराएको टोटनह्याम लयमा देखिएको छ ।

त्यस्तै आज राति लिभरपुलले स्वान्सीको सामना गर्ने छ । लिभरपुलले शुक्रबार आर्सनलसँग ३-३ को बराबरी खेलेको थियो । अंक तालिकाको पुछारमा रहेको स्वान्सी पनि क्रिस्टल प्यालेससँग १-१ को बराबरीम रोकिएको थियो ।

आज प्रिमियर लिगमा खेलिने अन्य खेलहरु:

बोर्नमथ विरुद्ध वेस्ट ह्याम – ८.४५ बजे

हडर्सफिल्ड विरुद्ध स्टोक सिटी – ८.४५ बजे

वाटफोर्ड विरुद्ध लेस्टर सिटी – ८.४५ बजे

वेस्ट ब्रोम विरुद्ध एभर्टन – ८.४५ बजे