दिपक बोहोरा
पाँचथर– विर्ता युनाइटेड नवौं रुस्लान फाल्गुनन्द गोल्ड कप फुटबल प्रतियोगिताको सेमिफाइनलमा पुगेको छ । आयोजक फिदिम स्पोर्टिङ क्लबलाई आज ७–१ को फराकिलो अन्तरले हराउँदै विर्ता उपाधि जोगाउने क्रममा अझै एक कदम अघि बढेको छ । विर्ताको जितमा विशाल राईले ह्याट्रिक गरे भने, कर्ण लिम्बुले २ तथा हिसुब थपलिया र नरेन लिम्बुले समान १ गोल गरे ।

विर्ता युनाइटेड । तस्बिर :दितप बोहोरा/ हाम्रो खेलकुद

फिदिम माविको मैदानमा खेलको पाँचौं मिनेटमा विशालको गोलबाट विर्ताले अग्रता लिएको थियो । योगेश गुरुङको पासमा विशालले गोल गरेका थिए । १२ औं मिनेटमा फिदिमका मनीष थापाले गरेको प्रहार क्लियर गर्ने क्रममा दिलेन लोक्तानले आत्माघाती गोल गर्दा खेल १–१ को बराबरीमा पुगेको थियो । तर, १९ औं मिनेटमा निशान्त खड्काको पासमा कर्णले गोल गरेर पुनः अग्रता बढाए ।

२८ औ मिनेटमा विशालको पासमा हिसुबले गोल गरे । ३६ औं मिनेटमा विशाल अर्को गोल थपे । ६२ औं मिनेटमा विशालले गोल गर्दै ह्याट्रिक पुरा गरेका थिए । यसपटक ह्याट्रिकमा पुरा गर्ने विशाल पहिलो खेलाडी हुन् । ७२ औं मिनेटमा नरेनले फ्रिकिकमा गोल गरे । फिदिमका खेलाडीले डिबक्स छेउमा फाउल हानेपछि प्राप्त फ्रिकिकमा नरेनले गोल गरेका हुन् ।

कर्णले ७४ औं मिनेटमा व्यक्तिगत दोस्रो गोल गरे । सुरुबाट नै दबाबमा परेको आयोजक फिदिम स्र्पोटिङ क्लबले खेलमा फकर्ने प्रयास निरन्तर गरे पनि प्रयास सफल भएन । फिदिमले केहि गोल गर्ने अबसरहरु गुमाएको थियो । विर्ताका विशाल म्यान अफ दी म्याच घोषित भए र उनले १० हजार रुपैयाँ प्राप्त गरे ।

विपक्षी टोलीमा स्टार खेलाडी हुँदा आफ्नो टोलीले खुलेर खेल्न नसकेको फिदिमका महासचिव पासाङ लामाले बताए । झापाका कप्तान नरेनले मेहनतका साथ नतिजा आफ्नो पक्षमा पार्न सफल भएको र अझै अघि बढ्ने विश्वास व्यक्त गरे ।

फाल्गुनन्द गोल्ड कपको विजेताले उपाधि सहित ३ लाख, दोस्रो हुने टोलीले २ लाख रुपैयाँ प्राप्त गर्नेछन् । सवोत्कृष्ट खेलाडीले मोटरसाइकल प्राप्त गर्ने प्रतियोगिताका उत्कृष्ट गोलकिपर, रक्षक , मिडफिल्ड, फरवार्ड र प्रशिक्षकले समान १० हजार रुपैयाँ पाउनेछन् ।

फाल्गुनन्द गोल्ड कपमा मंगलबार हुने खेल
युके एफसी दार्जिलिङविरुद्ध अग्नी रुपन्देही ११