म्याड्रिड (एजेन्सी) – एल क्लासिकोमा पराजयसँगै ला लिगामा चौथो स्थानमा रहेको रियल म्याड्रिडको शीर्ष स्थानको बार्सिलोनासँगको अन्तर १४ अंकमा बढेको छ । यो पराजयसँगै रियलको उपाधि रक्षा गर्ने सम्भावना टुंगियो देखिन्छ ।

तर रियल म्याड्रिडका डिफेन्डर डेनी कार्भाजल भने रियलले अझै लिग जित्न सक्नेमा आशावादी रहेको बताउँछन्, ‘हाम्रो टोलीले सकेसम्म प्रयास गर्नेछ , गणितीय सम्भावना रहेसम्म हामी उपाधि जित्ने लक्ष्यका साथ खेल्नेछौं । ‘

‘हाल १४ अंकको भिन्नता भएपनि हामी यसलाई अन्य समय जस्तै लिनेछौं , हामी हरेक खेल जित्नलाई खेल्नेछौं ‘, उनले बताए । ला लिगा अन्तर्गत शनिबारको खेलमा बार्सिलोनाको गोल गर्ने प्रयासलाई हातले रोकेपछि कार्भाजलले सोझै रातो कार्ड पाएका थिए ।

त्यस कार्ड पछि पाएको पेनाल्टीलाई लियोनल मेस्सीले सदुपयोग गर्दै बार्सिलोनालाई दोस्रो गोल दिलाएका थिए । त्यस रातो कार्डका बारेमा उनी भन्छन्, ‘रातो कार्डले रियलको पराजय निश्चित गर्यो । उच्च तीव्रताको खेलमा त्यस घटना पछि हामी २ गोल र १ खेलाडीले पछि पर्यौं ।’

‘रियलले ३ प्रतियोगितालाई निकै महत्वका साथ हेरेको छ । लिग जित्न मुस्किल छ तर नतिजा हाम्रो पक्षमा ल्याउन निकै मेहेनत गर्नेछौं । त्यस्तै च्याम्पियन्स लिग र कोपा डेल रेमा पनि राम्रो गर्नु छ । तसर्थ पछाडि नफर्किएर हामीले अब आउने ६ महिनाको बारेमा ध्यान दिन जरुरी छ ।  ‘