धनगढी (हाम्रो खेलकुद) – फारवेष्ट पशुपति कप नकआउट फुटबल प्रतियोगिताको उपाधि आयोजक टोलीले नै जितेको छ । पिएफए अत्तरियालाई टाइब्रेकरमा ३–२ ले हराउँदै आयोजक आयोजक फारवेष्ट पशुपति युवा क्लब च्याम्पियन बनेको हो ।

निर्धारित ९० मिनेट र थप १५ मिनेटमा पनि गोल नभएपछि फाइनलको निर्णय पेनाल्टी सुट आउटमा भएको थियो । पिएफए अत्तरियाका विश्व अधिकारी र जनक कार्कीको प्रहार पोष्ट नजिकबाट बाहिरिएको थियो । आयोजक टोलीका जिको आइस्याकको प्रहार पनि पिएफएका गोलकिपर टेकेन्द्र थापा रोकेका थिए ।

फारवेष्ट पशुपति क्लबले उपाधिसहित ३ लाख रुपैयाँ तथा पिएफएले १ लाख ५० हजार रुपैयाँ प्राप्त गर्यो । विजेता टोलीका प्रशिक्षक हरी बोहोराले लगातार तीन पटक फाइनल खेलेर पहिलो पटक च्याम्पियन बन्न सफल भएकोमा खुसी व्यक्त गरे । पहिलो पटक विजेता बनेका छौं, उनले भने, युवा र नयाँ खेलाडीहरुले उत्कृष्ट खेलेकै कारण विजेता बन्न सफल भएका हौं ।

पिएफएका सन्तोष भट्टले राम्रो खेल्दा खेल्दै पनि नतिजा निकाल्न नसकेको बताए । उनले आउने वर्षमा बलियो दाबेदारी प्रस्तुत गर्ने बताए । आयोजक टोलीका रोशन खत्री प्रतियोगिताको सर्वोत्कृष्ट खेलाडी घोषित भए । आयोजक टोलीका सेगुन उत्कृष्ट फरवार्ड , पिएफएका अमित तामाङ उत्कृष्ट रक्षक, आयोजक टोलीका प्रिमत खड्का उत्कृष्ट गोलकिपर र सोही टोलीका दिपेन्द्र बुढा उदयमान खेलाडी घोषित भए । उत्कृष्टले समान १० हजार रुपैयाँ जिते ।

यसैबीच फारवेष्ट पशुपति कपको अर्को संस्करणमा पुरस्कार राशीमा बृद्धि गर्दै विजेताले ४ लाख र दोस्रो हुने टोलीले २ लाख रुपैयाँ पाउने आयोजक फारवेष्ट पशुपति युवा क्लवका अध्यक्ष खेम रावतले घोषणा गरे । १० दिनसम्म सञ्चालन भएको प्रतियोगितामा १६ टोलीको सहभागिता थियो ।