अर्जुन कार्की
बागलुङ  – बागलुङमा प्रदेश नं ४ का नगरपालिका स्तरिय मेयर कप फुटबल हुने भएको छ । बागलुङ नगरपालिकाको आयोजनामा माघ १६ गतेदेखि २४ गतेसम्म प्रदेश नं. ४ स्तरिय मेयर कप फुटबल–२०७४ हुने शनिबार पत्रकार सम्मेलन गरी जानकारी गराइएको छ ।

जिल्लामै पहिलो पटक हुन लागेको प्रतियोगितामा प्रदेश नं. ४ का सबै नगरपालिकालाई सहभागिताको लागि आव्हान गरिएको र १२ वटा जति नगरपालिकाले सहभागिता जनाउन सक्ने बागलुङ नगरपालिकाका मेयर जनकराज पौडेलले पत्रकार सम्मेलनमा जानकारी दिए ।

हामीले जिल्लाको खेलकुदको विकासको लागि उक्त प्रतियोगिता संचालन गर्न लागिएको बताउँदै मेयर पौडेलले प्रतियोगिता गर्न १५ लाख खर्च लाग्ने अनुमान गरिएको बताए । प्रतियोगिता बागलुङ नगरपालिका–१को बाङ्गेचौर खेलमैदान र बागलुङ नगरपालिका–१० को भकुण्डे खेलमैदानमा संचालन गरिने बताइएको छ ।

प्रतियोगिताको विजेताले उपाधिसहित २ लाख २२ हजार २ सय २२ प्राप्त गर्नेछ । दोस्रो हुने टोलीले १ लाख ११ हजार १ सय ११ रुपैयाँ पाउनेछ । प्रतियोगिताको सर्वोत्कृष्ट खेलाडीले १० हजार पाउनेछन् । त्यस्तै उत्कृष्ट गोलकिपर, रक्षक , मिडफिल्ड, स्ट्राइकर र प्रशिक्षकले समान ५ हजार रुपैया पाउनेछन् ।

सेमिफाइनल पुग्ने टोलीका खेलाडीलाई पनि भत्ताको व्यवस्था गर्ने जनाइएइको छ । प्रतियोगितामा जिल्ला खेलकुद विकास समिति र जिल्ला फुटबल संघको पनि सहयोग रहने बताइएइको छ ।