म्याड्रिड (एजेन्सी) – रियल म्याड्रिडले घरेलु मैदानमा शनिबार क्लब फुटबलको सबै भन्दा ठूलो मानिएको खेल एल क्लासिको मा बार्सिलोनाको सामना गर्दैछ । यी दुई क्लबबीच यो २ सय ७० औं भिडन्त हुनेछ भने ला लिगामा यी दुइ टोली १ सय ७५ औं पटक भिड्ने छन् ।
फुटबलको यस महा भिडन्तमा कुन खेलाडी अहिलेसम्मको सबै भन्दा धेरै गोल गर्ने खेलाडी हुन् ?

जोसेप सामिटियर (रियल / बार्सा) , हुगो सान्चेज (रियल) , ज्वानिटो (रियल) – [१० गोल] : स्पेनिस मिडफिल्डर जोसेप सामिटियरले खेल जीवनमा बार्सिलोना र रियल दुवै टोलीबाट खेलेका हुन् । सन् १९१९ बाट १९३२ सम्म बार्सिलोनाबाट खेलेका उनले रियलमा दुइ सिजन बिताए । उनको ७० वर्षको उमेरमा निधन भयो । त्यस्तै ज्वानिटो रियलबाट १० सिजन बिताएका फुटबलर हुन् जसको  १९९२ मा ३७ वर्षको उमेरमा निधन भयो । हाल ५७ वर्षीय हुगो सान्चेजले भने रियलमा ७ वर्ष विताएका थिए ।

सान्टीलाना (रियल) – [१२ गोल] : रियल म्याड्रिडका लेजेन्ड स्ट्राइकर सान्टीलानाले १९७१ देखि १९७८ सम्म रियलमा बिताए । त्यसक्रममा २ सय ८९ गोल गरेका उनले १२ गोल एल क्लासिकोमा गरेका थिए ।

सेसर (बार्सिलोना), फेरेन्स पुस्कास (रियल), पाको जेन्टो (रियल) – [१४ गोल]  : बार्सिलोनाबाट १५ वर्ष खेलेका ससर रोड्रिग्वेज अल्भारेजले एल क्लासिकोमा १४ गोल गरे ।

रियलका फेरेन्स पुस्कासले करियरमा ५ सय ३० खेल खेल्दै ६ सय २२ गोल गरे , जस मध्ये २ सय ४२ गोल रियलबाट गरेका थिए । उनैको नाममा अहिले पुस्कस अवार्ड दिने चलन छन् । त्यस्तै रियलका पाको जेन्टोले पनि ‘एल क्लासिको’मा १४ गोल गरेका छन् ।

राउल (रियल) – [१५ गोल] : म्याड्रिडमा जन्म लिएका रियलका स्ट्राइकर राउलले ‘एल क्लासिको’मा १५ गोल गरेका छन् । एट्लेटिको म्याड्रिडको युथ एकेडेमी बन्द भएपछि रियलको एकेडेमीमा सरुवा भएका राउलले त्यसपछि रियलको दोस्रो टोली हुँदै सिनियर टोलीसम्म यात्रा तय गरेका हुन् ।

क्रिस्टियानो रोनाल्डो (रियल) – [१७ गोल] : यस सिजन ला लिगामा ४ गोल गर्न मात्र सफल रोनाल्डोले शनिबार हुने ला लिगामा गोल गर्दै आफ्नो आलोचनाहरु ठप्प गर्ने प्रयासमा हुनेछन्। रियलका स्टार स्ट्राइकर रोनाल्डो ‘एल क्लासिको’का तेस्रो सर्वाधिक गोल गर्ने खेलाडी हुन् ।

अल्फ्रेडो डी स्टेफानो  (रियल) – [१८ गोल] : रियलका लेजेन्ड अर्जेन्टिनी स्ट्राइकर अल्फ्रेडो स्टेफानो ११ वर्ष रियलमा आबद्ध थिए । २०१४ मा ८८ वर्षमा निधन भएका उनले एल क्लासिकोमा रियलबाट १८ गोल गरेका छन् । रोनाल्डोले यहि शनिबारको खेलमा गोल गर्दै अल्फानोसँगको आँकडा बराबरी गर्ने अवसर पाउनेछन ।

लियोनल मेस्सी (बार्सिलोना) – [२४ गोल] : बार्सिलोनाका ३० वर्षीय अर्जेन्टिनी स्ट्राइकर लियोनल मेस्सी २४ गोल सहित ‘एल क्लासिको’का सर्वाधिक गोलकर्ता हुन् । ला लिगामा १६, सुपर कपमा ६ र युरोपका खेलहरुमा दुई गोल गर्दै मेस्सीले ‘एल क्लासिको’मा २४ गोल गरेका छन् ।

अपडेट : शनिबार , डिसेम्बेर २३ -२०१७ मा रियल विरुद्ध गोल गर्दै मेस्सीले एलक्लासिकोमा २५ गोल पुरा गरेका छन् ।

अपडेट