दिपक बोहोरा

पाँचथर  – १६ औं राष्ट्रिय विभुति तथा महागुरु फाल्गुनन्द लिङदेनको सम्मानमा वर्षेनि आयोजना हुँदै आएको पूर्वी पहाडकै प्रतिष्ठीत फुटबल प्रतियोगिता फाल्गुनन्द गोल्डकपको नवौं संस्करण आजबाट पाँचथरको फिदिममा सुरु हुँदै छ । प्रतियोगिताको उद्घाटन खेल डिभाइन ब्वाइज युनियन काठमाण्डौँ र सुनसरी ११ बीच फिदिम मा.वी. को मैदानमा खेलिने छ ।

आजबाट सुरु हुने प्रतियोगिताको सम्पुर्ण तयारी पनि पुरा भइसकेको आयोजक फिदिम स्पोर्टिङ क्लबका अध्यक्ष विमल श्रेष्ठले जानकारी दिए । प्रतियोगितामा दर्शकको सुविधाको लागी करीब ४ हजार जना अट्ने प्यारापिट निर्माण गरिएको छ ।

अथिती र खेलाडीहरुको बसाईं, खाना र अथितिहरुको स्वागतको लागी समेत सबै तयारी पुरा भएको आयोजकले बताएका छन् । प्रतीयोगितामा सञ्चारकर्मीहरुको सुविधाको लागी खेलमैदान नजिक इन्टरनेट सहितको मिडिया डेस्क पनि सञ्चालन गरिने आयोजकले जानकारी दिए ।

पुष ७ गते देखि १५ गते सम्म सञ्चालन हुने प्रतियोगितामा नेपालका केहि ‘ए’ डिभिजनका क्लबहरु सहित १० टिमको सहभागिता रहने आयोजक फिदिम स्पोर्टिङ क्लबका महासचिव पासाङ तामाङले बताए ।

प्रतियोगितामा आयोजक फिदिम स्पोर्टिङ क्लब (पाँचथर), मिसन युनाइटेड क्लब (ताप्लेजुङ), बिर्ता युनाइटेड (झापा), मोरङ ११, सुनसरी ११, त्रिभुवन आर्मी क्लब (काठमाण्डौं), एपिएफ (काठमाण्डौं), अग्नी रुपन्देहि ११, डिभाइन ब्वाइज युनियन (काठमाण्डौं) र सिक्कीम युनाइटेडले उपाधिको लागि प्रतिस्पर्धा गर्ने आयोजकले बताए ।

९ दिन सम्म सञ्चालन हुने फुटबल प्रतियोगिताको विजेताले उपाधि सहित नगद ३ लाख प्राप्त गर्दा उपविजेताले नगद २ लाख प्राप्त गर्ने छ । हरेक दिनको ‘म्यान अफ दि म्याच’ तथा प्रतियोगिताको उत्कृष्ट रक्षक, प्रशिक्षक, मिडफिल्डर, फरवार्डले समान नगद १० हजार प्राप्त गर्ने छन् । प्रतियोगिताको सर्वाेकृष्ट खेलाडीले मोटरसाइकल प्राप्त गर्ने छ ।

अधिल्लो वर्ष टुर्वोगले प्रायोजन गरेको प्रतियोगितालाई यस वर्ष रुस्लानले मुख्य प्रायोजन गर्ने फिदिम स्पोर्टिङ क्लबका अध्यक्ष विमल श्रेष्ठले बताए । प्रतियोगिता सञ्चालनको लागी करीब ३८ लाख अनुमानित लागत लाग्ने पनि श्रेष्ठले बताए । अधिल्लो वर्ष आठौं फाल्गुनन्द गोल्डकपको उपाधि झापाको बिर्ता युनाइटेडले जितेको थियो ।