बार्सिलोना (एजेन्सी)– ‘एल क्लासिको’लाई महत्व दिने क्रममा बार्सिलोनाका महान खेलाडी जाभीले सुपर स्टार क्रिस्टियानो रोनाल्डो अर्का पूर्व सहकर्मी सुपर स्टार लियोनल मेस्सीको नजिक पनि नआउने दाबी गरेका छन् ।

रोनाल्डोले हालै पाँचौं पटक बालोन डी ओर जित्दै मेस्सीको कीर्तिमानसँग बराबरी गरेका थिए । तर, जाभीको नजरमा फुटबल इतिहासमै मेस्सी उत्केष्ट खेलाडी हुन् । ११ वर्ष अर्जेन्टिनी मेस्सीसँगै खेलेका जाभी फुटबलमा रोनाल्डो भन्दा निकै माथी रहेको बताउँछन् ।

‘रोनाल्डोको दाँजोमा मेसीले धेरै गर्न सक्दछन्,’ स्पेनिस जाभीले भने, ‘रोनाल्डोले आफुलाई इतिहासको उत्कृष्ट मान्छन् भने त्यसमा भन्नु केहि छैन । तर जसले मेस्सीको अभ्यास हेरेका छन् । त्यहाँ कुनै तुलाना हुँदैन । मेस्सी इतिहासको उत्कृष्ट हुन् । त्यसमा अर्को ढंगले हेर्नु पर्ने केहि छैन ।’
मेस्सीका कारण शनिबार हुने एल क्लासिकोमा फरक पर्ने जाभीको विश्वास छन् । बार्सिलोना र रियलबीच रियलको मैदानमा एल क्लासिको हुँदैछ । ‘मेस्सी फरक प्ले मेकर हुन् । हामी जहिले पनि उनलाई बल दिने प्रयास गर्दछौं ,’ उनले भने, ‘मेस्सी त्यस्ता खेलाडी हुन् विश्व फुटबलमै त्यसको फरकपन देख्न सकिन्छ । उनी अरु भन्दा माथि छन् । ‘

ला लिगाको शीर्षस्थानमा रहेको बार्सिलोना भन्दा रियल ११ अंकले पछाडि रहेको छ । उपाधि दौडलाई बलियो बनाउने हो भने शनिबारको खेल रियलले जित्नै पर्ने बाध्यता छ ।