काठमाडौं (हाम्रो खेलकुद)– बंगालदेशमा जारी साफ यू १५ महिला फुटबल च्याम्पियनसिपमा सहभागी चार राष्ट्र मध्ये नेपालको प्रदर्शन सबैभन्दा कमजोर प्रदर्शन रह्यो । राउन्ड रोविन लिगको अन्तिम खेलमा आज नेपालले भुटानसँग १–१ को बराबरी खेल्दै च्याम्पियनसिपको यात्रा अन्त्य गरेको छ ।

खेलको ९ औं मिनेटमा भुटानकी डेकी लाहाजुमले गोल गर्दै टोलीलाई अग्रता दिलाएकी थिइन् । तर ८१ औं मिनेटमा सबिता रानामगरले गोल गर्दै नेपाललाई खेलमा फर्काएकी थिइन् । खेलको अन्तिम समयमा नेपालकी सरस्वती हमाल पेनाल्टीबाट चुक्दा खेल १-१ मा टुङ्गियो ।

नेपाल र भुटान अन्तिम खेलअघि नै प्रतियोगिताबाट बाहिरिसकेका थिए । त्यस्तै आयोजक बंगलादेश र भारतले लगातार दुई खेल जित्दै फाइनल भेट पक्का गरिसकेका थिए । आज भएको खेलमा भारतलाई ३–० ले हराउँदै बंगलादेश शीर्षस्थानमा रहेको छ । बंगलादेशको ९ अंक रहेको छ भने भारतको ६ अंक रहेको छ ।  बंगलादेश र भारतबीच पुस ९ गते फाइनल हुनेछ ।

नेपालले ३ खेलमा १७ गोल खायो भने त्यसको बदला १ गोल गर्न सफल रह्यो । च्याम्पियनसिपबाट बाहिरिसकेको भुटानको भन्दा पनि नेपालको प्रदर्शन कमजोर रह्यो । भुटानले भने ३ खेलमा ७ गोल खाँदै १ गोल गरेको थियो । आयोजक बंगलादेशसँगको खेल ६–० ले गुमाएको नेपालले भारतसँगको खेलमा १०–० को हार बेहोरेको थियो । भुटानले दुवै खेल समान ३–० ले गुमाएको थियो ।