काठमाडौं (हाम्रो खेलकुद) – दक्षिण एसियाली स्तरको १२ औं संस्कणको सेभेन ‘ए’ साइड फुटबल प्रतियोगिता पोखरामा पुसको अन्तिम साताबाट आयोजना हुने भएको छ । आयोजक नेपाल सेभेन ‘ए’ साइड फुटबल फेडेरेसनले बुधबार राजधानीमा पत्रकार सम्मेलनको आयोजना गर्दै पुस २९ गतेबाट माघ ४ गतेसम्म पोखरा रंगशालामा हुने जानकारी गराएको हो ।

लिग कम नकआउटका आधारमा हुने प्रतियोगितामा दक्षिण एसियाका नेपालसहित भारत, श्रीलंका, माल्दिभ्स, बंगलादेश, भुटानर पाकिस्तान गरी सात राष्ट्रले सहभागिता जनाउने फेडेरेसनका अध्यक्ष नवीन पुनले जानकारी दिए । नेपाली टोलीका अहिले पोखरामा रुस्लान थ्रीस्टारका पूर्व प्रशिक्षक समेत रहेका राजेन्द्र तामाङको प्रशिक्षकत्वमा खेलाडी छनोट भैरहेको अध्यक्ष पुनले जानकारी दिए । उनले ‘ए’ डिभिजनका केही खेलाडी पनि समावेश हुन सक्ने बताए ।

प्रतियोगिताको विजेताले २ हजार अमेरिकी डलर र दोस्रो हुनेले १ हजार अमेरिकी डलर प्राप्त गर्नेछ । यस्तै उत्कृष्ट खेलाडी र हरेक विधाका उत्कृष्ट खेलाडीलाई पनि आकर्षक पुरस्कारको व्यवस्था गरिएको छ । १८ लाख ५० हजार रुपैयाँ खर्च हुने अनुमान गरिएको प्रतियोगितामा वचत हुने रकम फुटबल खेल विकास र विस्तारमा खर्च गरिने बताएका छन् ।

सन् २००६ बाट भारतबाट शुरु भएको प्रतियोगितामा नेपालले तेस्रो सहभागितामा दुई पटक च्याम्पियन बन्न सफल भैसकेको छ । नेपालले २००६ र सन् २०१० मा च्याम्पियन बनेको थियो । प्रतियोगिताको अघिल्लो संस्करणको विजेता बंगलादेश हो ।