काठमाडौं (हाम्रो खेलकुद) – नेपाल बंगलादेशमा जारी साफ यु १५ फुटबल च्याम्पियनसिपबाट बाहिरिएको छ । लगातार दास्रो खेलमा लज्जास्पद हार बेहोर्दै नेपाल अन्तिम खेलअघि नै च्याम्पियनसिपबाट बाहिरिएको हो । आज भएको खेलमा नेपाल भारतसँग १०–० ले पराजित भएपछि फाइनल पुग्ने नेपालको सम्भावना समाप्त भएको थियो ।

भारतसँग खेल्नुअघि नेपाली यु १५ महिला फुटबल टोली । तस्बिर सौजन्य : एनएसजेएएफ

नेपालले पहिलो र दोस्रो हाफमा समान ५ गोल खाएको थियो । भारतका लागि सुनिता मुन्डा र प्रियंकादेवीले ह्याट्रिक गरे भने लेन्डा कोमले २ तथा सन्थिया र अंनी बाइले समान १ गोल गरे । पहिलो खेलमा आइतबार नेपाल बंगलादेशसँग ६–० ले पराजित भएको थियो ।

भारत र बंगलादेश लिग राउन्डमा एक अर्कासँग भेट्नुअघि नै फाइनल पुगेका छन् । आजै भएको अर्को खेलमा आयोजक बंगलादेशले भुटानलाई ३–० ले हराएको थियो । भुटान पहिलो खेलमा भारतसँग ३–० ले पराजित भएको थियो । भुटानले २ खेलमा ६ गोल खादा नेपालले भने १६ गोल खाइसकेको छ ।

समान २ जितका साथ बंगलादेश र भारत अघि बढ्दा दुवै खेल हारेका नेपाल र भुटान च्याम्पियनसिपबाट बाहिरिएका छन् । लिग राउन्डको अन्तिम दिन बिहीबार च्याम्पियनसिपबाट बाहिरिएका नेपाल र भुटानबीच प्रतिस्पर्धा हुने छ भने अर्को खेल भारत र बंगलादेशबीच हुनेछ । फाइनल पुस ९ गते हुनेछ ।