काठमाडौं (हाम्रो खेलकुद) – पहिलो खेलको हारपछि नेपाली यु १५ महिला टोली दबाबमा परेको छ । बंगलादेशमा जारी साफ यु १५ महिला साफ च्याम्पियनसिपको पहिलो खेलमा आइतबार नेपालले आयोजक टोलीसँग ६–० को हार बेहोरेको थियो । अब नेपाली टोलीसँग धेरै विकल्प बाँकी छैन ।

अभ्यासका क्रममा नेपाली टाली । तस्बिर सौजन्य: एनएसजेएफ

आज दिउँसो भारतविरुद्ध हुने खेल गुमाएको खण्डमा नेपाल एक खेल बाँकी रहँदै प्रतियोगिताबाट बाहिरिने छ । सहभागी ४ टोलीले एकअर्कासँग खेलेपछि शीर्ष दुई टोलीले फाइनल खेल्नेछन् । बंगलादेशसँगै भारतले पनि पहिलो खेलमा जित दर्ता गर्दै फाइनलको दाबेदारी प्रस्तुत गर्ने छ । पहिलो खेलमा भारतले भुटानलाई ३–० ले हराएको थियो ।

नेपाल प्रतियोगिताको फाइनल पुग्ने सम्भावनालाई जीवित राख्ने जितको खोजीमा हुँदा भारत भने बंगलादेशसँगको खेलअघि नै फाइनलमा स्थान सुरक्षित गर्ने दाउमा हुनेछ । भारतले आजको खेल गुमाएकै खण्डमा पनि टोलीसँग अर्को एउटा मौका बाँकी रहनेछ । तर, नेपाललाई भने त्यो सुविधा हुने छैन । आजको खेल गुमाउँदा टोली लगभग प्रतियोगिताबाट बाहिरिनेछ । अर्को खेल बंगलादेश र भुटानबीच प्रतिस्पर्धा हुनेछ ।

बंगलादेशसँगको खेलमा भन्दा भारतविरुद्ध अलग रणनीति बनाउने प्रशिक्षक गंगा गुरुङले बताइन् । उनले मिडफिल्डमा देखिएको समन्वय अभावमा सुधारको प्रयासका साथै रक्षापक्तिलाई मजबुद बनाउने बताएकी छिन् । ढाकास्थित वीरश्रेष्ठ शहिद सिपाही मोहम्मद मुस्ताफा कमल रंगशालामा नेपाल र भारतबीचको खेल नेपाली समय अनुसार दिउँसो २ः१५ मा सुरु हुनेछ ।