धनगढी (हाम्रो खेलकुद) – सुदूरपश्चिम ११ स्पोर्टस क्लबका दुवै ए र बी टोली धनगढीमा जारी तेश्रो संस्करणको ग्यालेक्सी पबिलक स्कुल फारवेष्ट पशुपति कप फुटवल प्रतियोगिताको क्वार्टरफाइनलमा पुगेका छन् । आज भएका दुवै खेलमा जित हात पार्दै सुदूरपश्चिम ११ को ‘ए’ र ‘बी’ टीम अन्तिम आठमा पुगेका हुन् ।

धनगढी रंगशालामा सुदूपश्चिम ११ ए ले नेपाल प्रहरी प्रदेश नम्वर ७ लाई ४–० ले हरायो । विजेता टोलीका लागि विनोद केसीले २ तथा जीवन चौधरी र रामसिंह रानाले समान १ गोल गरे । ए टोलीका प्रशिक्षक ललित चन्दले चार जना सेटका खेलाडीहरुको अभावमा सुरुमा खेलमा तालमेल नभएपनि दोस्रो हाफमा रणनिति फेरेका कारण सहज जित दर्ता गरेको वताए । पराजित टोलीका प्रशिक्षक सुरेन्द्र वमले खेलाडीबीच तालमेल नमिल्नु र दोस्रो हाफमा गोल गर्नेतर्फ बढी ध्यान दिदा हार व्यहोरेको वताए ।

दोस्रो खेलमा पनि सुदूरपश्चिम बीले पशुपति स्कीमिमर्सलाई ५–० ले पराजित गरेको थियो । बीका लागि राजीव चौधरीको ह्याट्रिक गरे भने हिक्मत खत्री र रुपेश चौधरीले समान १ गोल गरे । सुदुरपश्चिम ११ बी का प्रशिक्षक सुरेश हमालले सोचे अनुसारको प्रदर्शन गरेको र १८ वर्ष मुनिका खेलाडीको टीमको आपसी तालमेल राम्रो हुँदा सहज जित हात पारेको बताए । स्कीमिमर्सका प्रशिक्षक अमित जैरुले पहिलो पटक ठुलो प्रतियोगिताा खेल्न पाएकोमा खुशी व्यक्त गर्दै राम्रो खेलेको र सुरुवातमै गोल खाँदा दवावमा खेल्नु परेको बताए ।

फारवेष्ट पशुपति युवा क्लवले आयोजना गरेको प्रतियोगिताको विजेताले ३ लाख र दोस्रो हुने टोलीले १ लाख ५० हजार रुपैयाँ प्राप्त गर्नेछन् । ८ गते सम्म चल्ने प्रतियोगिताका विभिन्न विधाका उत्कृष्ट खेलाडीले जनही १० हजार रुपैयाँ पाउनेछन् ।