काठमाडौं (हाम्रो खेलकुद) – नेपाली राष्ट्रिय फुटबल टोलीका नम्बर १ गोलकिपर किरण चेम्जोङ माल्दिभियन क्लब टिसी स्पोर्टस प्रेसिडेन्ट्स कप जित्न असफल भएको छ । गए राति मालेमा न्यू रेडियन्टसँगको फाइनल खेल टिसी स्पोर्टस् ले ३–० ले गुमाएको छ ।

गोलकिपर किरण चेम्जोङ । फाइल तस्बिर

सिजनको अन्तिम खेलका रुपमा रहेको फाइनलमा किरणले सबै ३ गोल दोस्रो हाफमा खाएका थिए । अलि फासिरले ६९ औं मिनेटमा पहिलो गोल गरे इब्राहिम फाजिल ८६ औं र इन्जुरी समयको तेस्रो मिनेटमा गोल गर्दै न्यू रेडियन्टलाई जित दिलाए । १४ औं मिनेटमा टिसी स्पोर्टस् ले प्राप्त पेनाल्टीमा गोल गर्न सकेन ।

यो सिजन न्यू रेडियन्टले ३ वटा उपाधि जित्दा किरणको टोली सबैमा उपविजेता रह्यो । न्यू रेडियन्टले यसअघि धिवेही प्रिमियर लिग (डिपिएल) र एएफए कपको उपाधि जितेको थियो । केहि दिनअघिको एफए कप फाइनलमा टिसी स्पोर्टस् न्यू रेडियन्टसँग टाइब्रेकरमा पराजित भएको थियो ।

उपाधिका साथ न्यू रेडियन्टको टोली ।

यो सिजन न्यू रेडियन्टसँगका सबै ७ खेलमा टिसी स्पोर्टस पराजित भयो । गत राति फाइनल खेल्नुअघि टिसी स्पोर्ट्स माले लिगमा २ खेल र डिपिएलमा २ खेलमा पराजित भयो । त्यस्तै एएफ ए कप र प्रेसिडेन्ट्स कपको पहिलो सेमिफाइनलमा टिसी स्पोर्टस् न्यू रेडियन्टसँगै पराजित भएको थियो । टिसी स्पोर्टस् को आफ्नो पहिलो सिजनमा किरण एउटा उपाधि जित्न सफल भएका थिए । गत वर्ष पुसमा टिसीमा आबद्ध भएको केहि समयमै किरण सम्मिलित टोलीले बंगलादेशमा शेख कमाल अन्तर्राष्ट्रिय क्लब च्याम्पियनसिप जितेको थियो ।