धनगढी (हाम्रो खेलकुद) – पिएफए अत्तरिया र फारवेष्ट अत्तरिया स्पोर्टस एकेडेमी धनगढीमा जारी तेस्रो संस्करणको ग्यालेक्सी पव्लिक स्कुल फारवेष्ट पशुपति कप फुटवल प्रतियोगिताको दोस्रो चरणमा प्रवेश गरेका छन् ।

धनगढी रंगशालामा शुक्रबार भएको खेलमा मनकामना युवा क्लव जुगेडालाई २–० ले पराजित गर्दै पिएफए अत्तरिया अन्तिम आठमा पुग्न सफल भएको हो । फारवेष्ट अत्तरिया स्पोर्टस एकेडेमी भने विपक्षी टीम अनुपस्थित भएपछि बाई पाएर अन्तिम आठमा पुग्न सफल भएको हो ।

विदेशी खेलाडीसहित मैदान उत्रिएको पिएफएले पहिलो हाफको सुरुवातमै दुई गोल गर्दै खेललाई आफ्नो पक्षमा पारेको थियो । पिएफएका लागि पहिलो हाफको १३ औं मिनेटमा विशाल राईले गोल गर्दै आफ्नो टीमलाई अग्रता दिलाए ।

त्यसको १२ मिनेटपछि अभिषेक रिजालले गोल गर्दै अग्रता दोब्वर पारे । खेलको सुरुवातामा समालिन नसक्दा दुई गोल खाएको मनकाना युवा क्लबले दोस्रो हाफमा सम्हालिएको प्रदर्शन गरेपनि गोल गर्ने मौकाहरु चुकाउँदा हार व्यहोर्नु पर्यो ।

यता, अत्तरिया स्पोर्टस क्लव बाई पाएर दोस्रो चरणमा प्रवेश गरेको छ । शुक्रबार हुने भनिएको पहिलो खेलमा सशस्त्र प्रहरी बल (एपिएफ) अनुपस्थित भएपछि स्पोर्टस एकेडेमी बाई पाएर दोस्रो चरणमा प्रवेश गरेको हो ।

फारवेष्ट पशुपति कप अन्तर्गत शनिबार दुई खेल हुनेछन । पहिलो खेलमा आयोजक फारवेष्ट पशुपति युवा क्लब ‘ए’ र नेपाल प्रहरी तथा दोस्रो खेलमा आयोजक फारवेष्ट पशुपति युवा क्लव ‘बी’ र पशुपति स्कीमिमर्स बीच हुने आयोजकले जनाएको छ ।

फारवेष्ट पशुपति युवा क्लवले आयोजना गरेको प्रतियोगिताको विजेताले ३ लाख तथा उपविजेताले १ लाख ५० हजार र विभिन्न ५ विधाका उत्कृष्ट खेलाडीले जनही १० हजारका दरले ५० हजार गरी ५ लाख नगद पुरस्कार पाउनेछन ।