दुहवी गोल्ड कपको सेमिफाइनलमा रुपन्देहीको सामना गर्दै आर्मी

बेलबारी (हाम्रो खेलकुद)– यो वर्ष नकआउट फुटबलमा सफल रहेको विभागिय टोली त्रिभुवन आर्मी क्लबले दोस्रो मनामोहर स्मृति दुहवी गोल्ड कप फुटबल प्रतियोगिताको सेमिफाइनलमा आज अग्नी रुपन्देही ११ को सामना गर्दैछ । दहवी रंगशालामा खेल दिउँसो ३ः०० बजे सुरु हुने बताइएको छ ।

आजको खेलको विजेता फाइनलमा लक्ष्मी हुन्डाई मनाङ मस्र्याङ्दी क्लबको सामना गर्नेछन् । आर्मीले आजको खेल जितेमा टोली वर्षको चौथो नकआउट फुटबल प्रतियोगिताको फाइनल पुग्नेछ । आर्मीले यो महिना झापामा दुई वटा नकआउट जितिसकेको छ । त्यसअघि टोली विशाल स्मृति गोल्ड कप फुटबल प्रतियोगिताको उपाधि जितेको थियो ।

यो महिनामा आर्मीले झापामा सताक्षी गोल्ड कप र मेची नेत्रालय काकरभिट्टा गोल्ड कप जितेको थियो । झापाका दुवै नकआउटमा आर्मीले मनाङलाई हराएको थियो । यसपटक दुवहीमा आर्मीले मोरङ ११ लाई टाइब्रेकरमा हराएको थियो । रुपन्देहीले ए डिभिजन क्लब हिमालयन शेर्पा क्लबलाई ३–० ले पराजित गरेको थियो ।

इलेभेन एरोज क्लब र मनमोहन स्मृति प्रतिष्ठानको संयुक्त आयोजनामा जारी प्रतियोगिताको विजेताले उपाधिसहित ४ लाख १ हजार रुपैयाँ प्राप्त गर्नेछ ।