बेलबारी (हाम्रो खेलकुद)– ए डिभिजन क्लब लक्ष्मी हुन्डाई मनाङ मस्र्याङ्दीले आज दोस्रो मनमोहन स्मृति दुवही गोल्ड कप फुटबल प्रतियोगिताको पहिलो सेमिफाइनलमा चर्च ब्वाइज काठमाडौंको सामना गर्दैछ । दुवही रंगशालामा खेल दिउँसो ३ः०० बजे सुरु हुने बताइएको छ ।

आजको विजेताले त्रिभुवन आर्मी क्लब वा अग्नी रुपन्देही ११ को विजेतासँग फाइनल खेल्नेछ । यो वर्ष एउटा नकआउट फुटबल प्रतियोगिताको उपाधि जितिसकेको मनाङले आजको खेल जितेमा टोलीले यो वर्ष चौथो पटक नकआउटको फाइनल पुग्नेछ । भदौमा चितवनमा जेसिज कप जितेको मनाङले पछिल्लो दुईवटा फाइनल भने हारेको थियो ।

यसै महिना एक साताको बीचमा झापामा सताक्षी गोल्ड कप र मेची नेत्रालय काकरभिट्टा गोल्ड कप दुवै फाइनलमा मनाङ विभागिय टोली आर्मीसँग पराजित भएको थियो । आर्मीले भने यो वर्ष तीन वटा उपाधि जितसकेको छ । झापामा दुई उपाधि जित्नुअघि आर्मीले विशाल स्मृति गोल्ड कप फुटबल प्रतियोगिताको उपाधि उचालेको थियो ।

दुवहीमा मनाङले आयोजक इलेभन एरोज क्लबलाई ५–२ ले हराउँदै अन्तिम चारको यात्रा तय गरेको थियो । राष्ट्रिय फुटबल टोलीका सदस्य विक्रम लामाको कप्तानीमा रहेको चर्च ब्वाइज मोफसलको बलियो टोली रमपम झापा ११ लाई टाइब्रेकरमा हराउँदै सेमिफाइनलमा पुगेको थियो । इलेभेन एरोज र मनमोहन स्मृति प्रतिष्ठानले संयुक्त रुपमा आयोजना गरेको प्रतियोगिताको विजेताले उपाधिसहित ४ लाख १ हजार रुपैयाँ प्राप्त गर्नेछ ।