म्युनिख (एजेन्सी)– आयर्न रोबेन र फ्रान्क रिबेरीसँग उनीहरुको भविष्यले लिएर गम्भिर छलफल अघि बढाइएको बायर्न म्युनिखका अध्यक्ष कार्ल हेनिज रुमेनिगले बताएका छन् ।

रोबेन र रिबेरी दुवैको यो सिजनको अन्त्यसँगै क्लबसँगको सम्झौता टुंगिनेछ । रोबेनले चाँडै सन्यासको घोषणा गर्ने संकेत गरेका छन् भने रिबेरीले अझै ३/४ वर्ष खेलेर बायर्नबाटै सन्यास लिने योजना बनाएका छन् । अध्यक्ष रुमेनिगले दुवै खेलाडी क्लबका लागि महत्वपूर्ण रहेको र क्लबले भविष्यमा पनि उनीहरुलाई साथ राख्न चाहेको बताएका छन् ।

‘रोबेन र रिबेरी दुवैको ठूलो इतिहास छ । हामीलाई थाहा छ उनीहरुसँग हाम्रो कस्तो अनुभव छ । दुवै हाम्रो लागि महत्वपूर्ण छन्,’ उनले भने, ‘तर उनीहरुका कति निरन्तरता चाहन्छन्, त्यो महत्वपूर्ण हुन्छ । तत्काल यो विषयमा निर्णय लिन कठिन छ । यद्दपी हामी गम्भिर छलफलमा छौं । अहिले भन्नु हतार हुनेछ ।’

रिबेरी र रोबेनको क्लबसँगको यात्रा झन्डै दशक पुरा गरेको छ । रिबेरी सन् २००७ देखि र रोबन २००९ देखि क्लबमा रहेका छन् । फ्रान्सेली रिबेरीले क्लबका लागि ३ सय ६५ खेल खेलिसकेका छन् । त्यस क्रममा उनले १ सय १२ गोल गरेका छन् । उनले क्लबबाट ७ बुन्डेस लिगा उपाधि, ५ डिएफबी र २०१२ मा युइएफए च्याम्पियन्स लिग उपाधि जितेका थिए ।

रियल म्याड्रिडबाट बायर्न पुगेयता २ सय ७३ खेल खेलेका रोबेनले १ सय ३४ गोल गरिसकेका छन् । क्लबले ६ बुन्डेसलिगा, ४ डिएफबी र च्याम्पियन्स लिग जित्दा टोलीको महत्वपूर्ण सदस्य रहेका थिए ।