दुहवी (हाम्रो खेलकुद) – विभागिय टोली त्रिभुवन आर्मी क्लब मनमोहन स्मारक दुहवी गोल्ड कप फुटबल प्रतियोगिताको सेमिफाइनलमा पुगेको छ । मोरङ ११ लाई टाइब्रेकरमा ३–१ ले हराउँदै आर्मी अन्तिम चारमा पुगेको हो । आर्मीले सेमिफाइनलमा अग्नी रुपन्देही ११ र हिमालयन शेर्पाको विजेतासँग सेमिफाइनल खेल्नेछ । 

बल पछ्याउने क्रममा आर्मीका स्ट्राइरक नवयुग श्रेष्ठ (दायाँ) । तस्बिर सौजन्य- खनिन्द्रकुमार राई ।

आजको खेलको निर्धारित समय १–१ को बराबरीपछि खेल निर्णयका लागि टाइब्रेकरमा धकेलिएको थियो । खेल सकिन ४ मिनेट दीप लामाले गोल गर्दै आर्मीलाई खेलमा फर्काएका थिए । त्यसअघि १४ औं मिनेटमा प्रकाश बुढाथोकीको गोलमा मोरङले अग्रता लिएको थियो ।

पेनाल्टीमा मोरङका लागि निराजन खड्काले मात्र गोल गर्न सके । प्रकाश बुढाथोकी, अशोक खवास र मीन धिमालको प्रहारलाई आर्मीका गोलकिपर विकेश कुथुले रोके । विकेशनै खेलको म्यान अफ दी म्याच घोषित भए र उनले ५ हजार रुपैयाँ प्राप्त गरे ।आर्मीका लागि नवयुग श्रेष्ठ, सन्तोष तामाङ र दीपले गोल गरे । भरत खवासको प्रहार भने विपक्षी गोलकिपरले रोके ।

यो वर्ष ३ नकआउट उपाधि जितिसकेको आर्मी टाइब्रकेरमा भाग्यशाली सावित रह्यो । मोहन स्मारक फाउन्डेसन र इलेभेन एरोज क्लबले आयोजना गरेको प्रतियोगिताको विजेताले उपाधिसहित ४ लाख १ हजार रुपैयाँ प्राप्त गर्नेछ ।