म्याड्रिड (एजेन्सी) – ला लिगा अन्तर्गतको खेलमा रियल म्याड्रिडले सेभिल्लामाथि ५-० को सहज जित दर्ता गरेको छ । क्रिस्टियानो रोनाल्डोले दुइ गोल गरे भने, नाचो फरन्याण्डेज , टोनी क्रुस र आचरफ हाचिमीले पनि गोल गरे । रियलको पाँचै गोल पहिलो हाफमा भयो ।

घरेलु मैदानमा रियल तेस्रो मिनेटमा अग्रता लिन सफल भयो । कर्नरमा सेभिल्लाका स्ट्राइकर लुइस मुरियालले सहजै क्लियर गर्नुपर्ने बल नाचोले पाएपछि उनले रियललाई अग्रता दिलाएका थिए । खेलको २३ औं मिनेटमा रियलले अग्रता दोब्बर गरे । असेन्सियोको पासमा रोनाल्डोले गोल गर्दै ला लिगामा सिजनको तेस्रो गोल गरे । त्यस्तै ३१ औं मिनेटमा पेनाल्टी मार्फत रोनाल्डोले व्यक्तिगत दोस्रो गोल गरे । जिसस नाभासले आफ्नै बक्समा मर्सेलोलाई मार्क गर्ने क्रममा ह्यान्ड गरेपछि पाएको पेनाल्टीलाई रोनाल्डोले सदुपयोग गरे । रोनाल्डोको पेनाल्टी किपरलाई ठोकिदै गोलमा परिणत भयो ।

खेलको ३८ औं मिनेटमा टोनी क्रुसले तथा ४१ औं मिनेटमा १९ वर्षिय हाचिमीले रियललाई थप गोल दिलाए । दोस्रो हाफमा कुनै गोल हुन सकेन ।

अन्य खेलहरुमा डिपार्टिभो ला कोरुनाले अलाभेसलाई १-० ले तथा भ्यालेन्सियाले सेल्टा भिगोलाई २-१ ले हरायो भने ऐबार र गेटाफेले गोलरहित बराबरी खेले । जितसंगै रियल तेस्रो स्थानमा उक्लेको छ भने भ्यालेन्सिया दोस्रोमा कायम छ ।चौथो स्थानको एथ्लेटिको म्याड्रिड र रियलसँग ५ अंकको अग्रता लिँदै शिर्षस्थानमा रहेको बार्सिलोनाले १ खेल खेल्न बाँकी छ ।

हाइलाइट्स