बार्सिलोना (एजेन्सी) – बार्सिलोनाका स्टार स्ट्राइकर लियोनल मेस्सीले सहज गोल गर्ने अवसर गुमाएपछि बार्सिलोना घरेलु मैदानमा सेल्टा भिगोसँग २-२ को बराबरीमा रोकिएको छ ।  

भ्रमणकारी सेल्टाले खेलको २० औं मिनेटमा अग्रता लिएको थियो ।म्याक्सी गोमेजको प्रहारलाई बार्सिलोनाका गोलकिपरले रोकेपनि लिभरपुलका पूर्व स्ट्राइकर आइगो आसपासले सहजै ट्याप गर्दै सेल्टालाई अग्रता दिलाए । मेस्सीले ३ मिनेट पछि बार्सिलोनालाई बराबरी दिलाए । पौलिन्होको पासलाई सदुपयोग गर्दै मेस्सीले १० यार्डबाट गोल गरे।

पहिलो हाफमा बराबरीमा रहेको बार्सिलोनाले लुइस स्वारेजको गोलमा अग्रता पायो । खेलको ६३ औं मिनेटमा जोर्डी अल्बा र मेस्सीबीचको राम्रो तालमेल पछि पाएको बललाई स्वारेजले ६ यार्डबाट गोल गर्दै बार्सिलोनालाई अग्रता दिलाए । तर त्यो अग्रता धेरै समय रहेन । ७० औं मिनेटमा म्याक्सी गोमेजले सेल्टालाई खेलमा फर्काए । आसपासले सुरु गरेको काउण्टर एट्याकमा गोमेजले गोल गरेका हुन् ।

खेलको ८५ औं मिनेटमा मेस्सीले गोल गर्ने सहज मौका गुमाए । लुइस स्वारेजको प्रहार डिफेन्डरमा लाग्दै फर्किएपछि डेनी स्वारेजले दोस्रो पटक पाएको मौकामा राम्रोसँग नलाग्दा मेस्सीले हेड मार्फत फ्लिक गरेको प्रहार बाहिरिएको थियो ।