झापा (हाम्रो खेलकुद) – ‘ए’ डिभिजनका दुई चिरपरिचित प्रतिद्धन्द्धी लक्ष्मी हुन्डाई मनाङ मस्र्याङ्दी क्लब र त्रिभुवन आर्मी क्लब मेची नेत्रालय काकरभिट्टा गोल्ड कप फुटबल प्रतियोगिताको उपाधिको लागि आज प्रतिस्पर्धा गर्दैछ ।

आर्मी र मनाङबीच यो वर्षको दोस्रो उपाधि भिडन्त हो । यसअघि झापामै भएको सताक्षी गोल्ड कपमा आर्मी र मनाङले उपाधिको लागि प्रतिस्पर्धा गरेका थिए । जसमा आर्मीले बाजी मारेको थियो । शुक्रबार आर्मीले उपाधि जिते आर्मीको यो तेस्रो उपाधि हुनेछ भने मनाङको दोस्रो उपाधि हुनेछ । भदौमा मनाङले चितवनमा जेसिज कप फुटबल प्रतियोगिताको उपाधि जितेको थियो भने आर्मीले त्यो भन्दा अघि विशाल स्मृति गोल्ड कपको उपाधि जितेको थियो ।

नकआउट फुटबलमा गत वर्ष मनाङ सर्वाधिक सफल टोली रहेको थियो भने त्यसपछिका सफल टोली आर्मी र सिएमजी क्लब संकटा रहेका थिए । मनाङले चारवटा उपाधि जित्दा आर्मी र सिएमजीले समान ३ नकआउट उपाधि जितेका थिए । मनाङ र आर्मीमध्ये जसले जितेपछि यो टोलीको दोस्रो उपाधि हुनेछ ।

गत वर्ष मनाङ र आर्मीबीच ३ वटा फाइनल भएको थियो । जसमध्ये दुहबी गोल्ड कप र हेटौडा गोल्ड कपमा आर्मीले बाजी मारेको थियो भने मनाङले राजर्षी गोल्ड कपको उपाधि जितेको थियो ।

शुक्रबार मनाङ आर्मीलाई पराजित गर्ने र अघिल्लो साता सताक्षी गोल्डकपमा बेहोरेको हारको बदला लिने लक्ष्यसहित मैदान उत्रनेछ । मनाङसँग राष्ट्रिय टिमका ८ खेलाडी समावेश छ । तर, मनाङको प्रदर्शन काकरभिट्टा गोल्ड कपमा सोचेजस्तो प्रदर्शन हुन सकेको छैन । मनाङसडन डेथमा विपक्षी टिमलाई पाखा लगाउदै फाइनलसम्म पुग्न सफल भएको हो । मनाङसँग राष्ट्रिय टिमका विमल घर्ती मगर, विराज महर्जन, विशाल राई र अनन्त तामाङ हेमन गुरुङलगायतको खेलाडी रहेका छन् ।

यता, आर्मी भने विपक्षी टिमलाई सहजै पराजित गर्दै फाइनलसम्म पुग्न सफल भएको टोली हो । मोसफलको सर्वाधिक पुरस्कार राशी रहेको काकरभिट्टा गोल्ड कपको विजेताले उपाधिसहित ८ लाख रुपैयाँ प्राप्त गर्नेछ ।