काकारभिट्टा( हाम्रो खेलकुद)– मेची नेत्रालय काकरभिट्टा गोल्ड कप फुटबल प्रतियोगिताको दोस्रो सेमिफाइनलमा आज लक्ष्मी हुन्डाई मनाङ मस्याङ्दी क्लब र आयोजक काकरभिट्टा फुटबल ट्रेनिङ सेन्टर बीच प्रतिस्पर्धा हुँदैछ ।

फाइल तस्बिर

आजको विजेताले फाइनलमा विभागिय टोली त्रिभुवन आर्मी क्लबको सामना गर्नेछ । आमीले हिजो अर्को विभागिय टोली नेपाल पुलिस क्लबमाथि ३–० को जित निकाल्दै अन्तिम दुईको यात्रा तय गर्नेछ । मनाङले आजको खेल जित्न सके वर्षको दोस्रो नकआउट उपाधिका लागि चुनौति पेश गर्नेछ । भदौमा मनाङले चितवनमा जेसिज कपको उपाधि जितेको थियो ।

गत साता भने टोली सताक्षी गोल्ड कपको फाइनलमा आर्मीसँग पराजित भएको थियो । आज आयोजकलाई हराउन सके मनाङले लगातार दोस्रो साता आर्मीसँग फाइनल खेल्नेछ । मनाङ गत वर्षको सर्वाधिक सफल टोली हो । गत वर्ष टोलीले ४ नकआउट उपाधि जित्दा आर्मी र सिएमजी क्लब संकटाले समान ३ उपाधि जितेका थिए ।

काकरभिट्टामा पनि मनाङको यात्रा सहज रहेन । अग्नी रुपन्देहीलाई सडन डेथमा हराउँदै मनाङ अन्तिम चारमा पुगेको थियो । आयोजक टोलीले भने हिमालयन शेर्पाको चुनौतिलाई १–० ले पाखा लगाउँदै अघि बढेको थियो । मोसफलको सर्वाधिक पुरस्कार राशी रहेको काकरभिट्टा गोल्ड कपको विजेताले उपाधिसहित ८ लाख रुपैयाँ प्राप्त गर्नेछ ।