काकरभिट्टा (हाम्रो खेलकुद)– त्रिभुवन आर्मी क्लब मोफसलको सर्वाधिक पुरस्कार राशीको मेची नेत्रालय काकरभिट्टा गोल्ड कपको फाइनल पुगेको छ । काकरभिट्टा माविको मैदानमा आज भएको सेमिफाइनलमा अर्को विभागिय टोली नेपाल पुलिस क्लबलाई ३–० ले हराउँदै आर्मी उपाधि नजिक पुगेको हो ।

आर्मीको तीनै गोल दोस्रो हाफमा सम्भव भएको हो । दिनेश हेम्जनले खेलको ५४ औं र ६४ औं मिनेटमा गोल गरे भने जर्ज प्रिन्स कार्कीले ८५ औं मिनेटमा गोल गर्दै जित सुनिश्चित गरेका थिए । ‘म्यान अफ द म्याच’ दिनेशले १० हजार नगदसाथै पहिलो गोल गरेवापत रु. तीन हजार पनि प्राप्त गरे।

आर्मी वर्षको तेस्रो उपाधिको नजिक पुगेको छ । गत साता लक्ष्मी हुन्डाई मनाङ मस्याङ्दीलाई पराजित गर्दै सताक्षी गोल्ड कपको उपाधि जितेको आर्मीले त्यसअघि वर्षको पहिलो उपाधिका रुपमा विशाल स्मृति गोल्ड कप जितेको थियो । आर्मीले आयोजक काकरभिट्टा र मनाङबीच बुधबार हुने सेमिफाइनलको विजेतासँग फाइनल खेल्नेछ ।

नेपाली फुटबलमा सफल इतिहास बोकेको पुलिस केही वर्षयता नकआउट प्रतियोगितामा पनि कमजोर रहँदै आएको छ । अर्को विभागिय टोली आर्मीले भने लगातार उच्च प्रदर्शन गरिरहेको छ । गत वर्ष घरेलु फुटबलमा १० नकआउट फुटबलको फाइनल खेलेको आर्मीले ३ वटा उपाधि जितेको थियो । काकरभिट्टा फुटबल ट्रेनिङ सेन्टरले आयोजना गरेको प्रतियोगिताको विजेताले उपाधिसहित ८ लाख रुपैयाँ प्राप्त गर्नेछ ।