काकरभिट्टा (हाम्रो खेलकुद)– दुई विभागिय टोली त्रिभुवन आर्मी क्लब र नेपाल पुलिस क्लब मोफसलको सर्वाधिक पुरस्कार राशीको मेची नेत्रालय काकरभिट्टा गोल्ड कपको सेमिफाइनलमा आज प्रतिस्पर्धा गर्दैछन् । काकरभिट्टा माविको मैदानमा खेल दिउँसो ३ बजे सुरु हुनेछ ।

नेपाली फुटबलमा सफल इतिहास बोकेको पुलिस केही वर्षयता पुलिस नकआउट प्रतियोगितामा पनि कमजोर रहँदै आएको छ । अर्को विभागिय टोली आर्मीले भने लगातार उच्च प्रदर्शन गरिरहेको छ । गत वर्ष घरेलु फुटबलमा १० नकआउट फुटबलको फाइनल खेलेको आर्मीले ३ वटा उपाधि जितेको थियो ।

यो वर्ष पनि टोली सोही बाटोमा अघि बढिरहेको छ । यो वर्ष २ वटा नकआउट उपाधि जितिसकेको आर्मी अर्को उपाधिको सम्भावनालाई जीवित राख्न आज सेमिफाइनलमा पुलिसको सामना गर्दैछ ।  गत सातामात्र अर्को ए डिभिजन टोली लक्ष्मी हुन्डाई मनाङ मस्याङ्दीलाई हराउँदै आर्मीले सताक्षी गोल्ड कप फुटबल प्रतियोगिताको उपाधि जितेको थियो ।

त्यसअघि टोलीले वैशाखमा विशाल स्मृति गोल्ड कपको उपाधि जितेको थियो । पुलिस भने यता राजधानीमा आयोजना भएको चन्द्रागिरी गोल्ड कपमा सहभागी हुदै झापा पुगेको थियो । काकरभिट्टा फुटबल ट्रेनिङ सेन्टरले आयोजना गरेको प्रतियोगिताको विजेताले उपाधिसहित ८ लाख रुपैयाँ प्राप्त गर्नेछ ।