म्याड्रिड (एजेन्सी)– चोटमुक्त भएका रियल म्याड्रिडका ग्यारेथ बेल कोपा डेल रेमा फुनलाब्राडासँगको खेलमा उत्रने सम्भावना रहेको छ । महिनाको सुरुआतमा ह्यामस्ट्रिङ समस्याबाट पीडित भएका वेल्सका स्टार अहिले चोटमुक्त भएको बताइएको छ । टोलीका प्रशिक्षक जिनेदिन जिदानले घरेलु मैदानमा आज तेस्रो श्रेणीको टोलीविरुद्ध हुने खेलमा बेललाई उतार्ने सम्भावना छ ।

सेप्टेम्बर २६ मा च्याम्पियन्स लिगमा बोरुसिया डर्टमन्डको खेल यता चोटका कारण बेल मैदान बाहिर रहँदै आएका छन् । त्यसयताका उनले सबै ११ खेल गुमाइएसकेका छन् । ह्यामस्ट्रिङ अघि उनको पिडौलामा चोट लागेको थियो । २८ वर्षे बेलले यो सिजन मात्र ८ खेल सुरुआत गरेका छन् । यो सिजन उनले क्रिस्टियानो रोनाल्डो र करिम बेन्जिमाका साथ सुरुआत गरेका छैनन् ।

लगातारका चोटका कारण पनि स्पेनिस एवंम् युरोपियन च्याम्पियन टोलीमा उनको भविष्यलाई लिएर अनेक खाले अड्कल बाजी हुने गरेका छन् । रियलमा रहँदाका ४ वर्षमा बेललाई सानाठूला गरि ११ वट चोट लागिसकेको छ । अब भने बाँकी सिजन टोलीमा उनको महत्वपूर्ण भूमिका रहने विश्वास गरिएको छ ।

रियलले यो सिजन ला लिगामा सन्तोषजनक सुरुआत गर्न सकेको छैन । शीर्षस्थानको बार्सिलोनाभन्दा रियल अझै ८ अंले पछाडि रहेको छ । रियलले शनिबार एथलेटिको बिलबाओको सामना गर्दैछ । त्यस्तै रियलले च्याम्पियन्स लिगअन्तर्गत समूह चरणको अन्तिम खेल डर्टमन्डसँग डिसेम्बर ६ मा खेल्नेछ । रियल च्याम्पियन्स लिगको अन्तिम १६ मा पुगिसकेको छ ।

डिसेम्बर ९ मा सेभिलासँग घरेलु मैदानमा खेलेपछि रियल फिफा क्लब विश्व कपका लागि अबुधावी पुग्नेछ । एसिया भ्रमणबाट फर्केपछि रियल र बार्सिलोनाबीच डिसेम्बर २३ मा खेल हुनेछ । सबै खाले प्रतियोगितामा गरि ९ खेल खेलेका बेलले ३ गोल गर्दै ४ वटा एसिस्ट गरेका छन् ।