बार्सिलोना (एजेन्सी)– अनेक अड्कलबाजीका बीच लियोनल मेस्सीले बार्सिलोनासँग नयाँ सम्झौतामा हस्ताक्षर गरेका छन् । मेस्सी र स्पेनिस महारथीबीच साढे चार वर्षको नयाँ सम्झौता भएको छ ।

बार्सिलोनामा रहनेमा मेस्सीले सहमति जनाएको क्लब व्यवस्थापनले बताइरहँदा पनि उनीहरुबीच नयाँ सम्झौता भने हुन सकेको थिएन । अन्नतः लामो प्रतिक्षापछि बार्सिलोनाको मेस्सीसँग सम्झौता भएको छ । मेस्सीले चौथो पटक गोल्डेन बुट जितेको एक दिनपछि उनले क्लबसँग सम्झौता गरेका हुन् ।

योसँगै उनी अन्य युरोपियन क्लबमा जाने सम्भावनाको अन्त्य भएको छ । नयाँ सम्झौतामा उनलाई खरिद गर्न चाहने टोलीले ७ सय मिलियन युरो तिर्नुपर्ने सर्त राखिएको छ । त्यसैले आफ्नो पुरै खेल जीवन बिताएको क्लबबाट उनलाई कसैले किन्ने कुरा असम्भवजस्तै देखिन्छ ।

शनिबारको अवार्ड कार्यक्रमसम्म पनि मेस्सीले नयाँ सम्झौताका विषयमा छलफल गर्न नचाहेको बताइएको थियो । तर, मेस्सीका बाबु जोर्जेले भने उनले क्लबसँग नयाँ सम्झौता गरिसकेको बताएका थिए । यद्दपी मेस्सीले सम्झौतामा दस्तखत नगरेसम्म उनले क्लब छोड्ने सम्भावनाको हल्ला लगातार चलेको थियो ।

म्यानचेस्टर सिटी र पेरिस सेन्ट जर्मेन मेस्सीलाई भित्राउन प्रयासरत थिए । तर, अब सबै सम्भावना टुंगिएको छ । मेस्सीले क्लबका लागि ३० वटा उपाधि जितिसकेका छन् । जसमा ८ ला लिगा उपाधि, ४ च्याम्पियन्स लिग उपाधि र ५ कापा डेल रे उपाधि छन् ।

अर्जेन्टिनी फुटबल टोलीका कप्तानसमेत रहेका ३० वर्षे मेस्सीले क्लबका लागि कीर्तिमानी गोल गरेका छन् । उनले ६ सय २ खेलमा ५ सय २३ गोल गरिसकेका छन् । अझै उनी उच्च फर्ममा रहेकाले उनको कीर्तिमान तोड्ने तत्काल सम्भावना देखिएको छैन ।