बार्सिलोना (एजेन्सी)– बार्सिलोनाका डेनिस स्वारेजले सुपर स्टार लियोन मेस्सी आउने थ्रुपै वर्ष क्लबमै रहने दाबी गरेका छन् । स्वारेजले भनेका छन्, ‘बार्सिलोना उनको जीवन हो ।’ खेलकुद इतिहासकै उत्कृष्ट खेलाडीमध्येका एकका रुपमा हेरिएका ३० वर्षे मेस्सीले बार्सिलोनासँग अझै सम्झौता भने गर्न बाँकी छ । उनको अहिलेको सम्झौता सन् २०१८ को जुन सम्म रहेको छ ।

बार्सिलोना बोर्डले भने उनको सम्झौता २०२१ सम्म पक्का भएको बताएका छन् । यद्दपी त्यो औपचारिक रुपमा सार्वजनिक हुन भने बाँकी रहेको छ । पछिल्लो समय उनी पेरिस सेन्ट जर्मेन, म्यानचेस्टर सिटी वा चाइजिन सुपर लिग क्लबमा जाने सम्भावना रहेको पनि बताइन्छ ।

‘मलाई विश्वास छ उनी अझै धेरै वर्ष यहाँ रहनेछन् । उनी हरेक दिन हामीसँग अभ्यासमा व्यस्त रहन्छन् ’ स्वारेजले भनेका छन्,‘सबैलाई थाहा छ बार्सिलोना उनको जीवन हो ।’ उनले मेस्सीका विषयलाई लिएर कुनै चिन्ता नरहेको पनि प्रष्ट पारेका छन् । उनले भने ‘हामीलाई आशा छ उनीले क्लबमा निरन्तरता दिनेछन् । हामी उनको वरिपरि खेल्न खुसी हुन्छौं । ’

मेस्सीले सिजनको सुरुआत दमदार ढंगले गरेका छन् । उनको टोली ला लिगामा ३५ अंकसहित शीर्षस्थानमा रहेको छ । १२ खेलको समाप्तीमा बार्सिलोनाले दोस्रो स्थानको भ्यालेन्सियालाई ४ अंक र रियल म्याड्रिडलाई १० अंकले पछाडि पारेको छ ।  बार्सिलोनाले ला लिगामा आइतबार भ्यालेन्सियाको सामना गर्दैछ ।