झापा (हाम्रो खेलकुद) – काँकरभिट्टामा आयोजित तेश्रो मेची नेत्रालय काँकरभिट्टा गोल्डकपमा सुदूरपश्चिम टोलीले क्वाटरफाइनलमा आफ्नो स्थान बनाएको छ । नियमित समयमा खेल २-२ को बराबरीमा टुङ्गिएपछि पेनाल्टीमा झापालाई हराउँदै सुदूरपश्चिमले अन्तिम आठमा आफ्नो स्थान बनाएको हो ।

पहिलो हाफमा दुवै टोलीले निकै अवसरहरु पाए पनि तिनको सदुपयोग गर्न नसक्दा सो हाफ गोलरहित भएको थियो । तर खेलको ५७ औं मिनेटमा विशुन गुरुङले फ्रिकिकमा हेडरमार्फत सुदूरपश्चिमलाई अग्रता दिलाएका थिए । ६८ औं मिनेटमा भने झापाले गोल गर्दै खेलमा फर्किएको थियो ।

खेलमा चार मिनेट बाँकी हुँदा सुदूरपश्चिमका चेतन थारुले फ्रिककबाट गोल गर्दै स्कोर २-१ बनाएका थिए । तर झापाका मार्टिनले इन्जुरी समयमा गोल गर्दै खेललाई पेनाल्टीमा पुर्‍याएका थिए ।

पेनाल्टीमा सुदूरपश्चिमले झापालाई ५-४ ले हराउन सफल भएको थियो । सुदूरपश्चिमका लागि नरेन्द्र चौधरी, राकेश हमाल, चेतन थारु, विनोद केसी र फिलिप तामाङले पेनाल्टी परिणत गरेका थिए भने झापाका योगेश गुरुङ, दिलेन लोक्ताङ, सुमिन मैनाली र छिरिङ गुरुङ पनि चुकेनन् ।

तर नरेन्द्र लिम्बूको प्रहारलाई गोलकिपर अनन्त शेखले बचाउँदै जित सुनिश्चित गरेका थिए । खेलका म्यान अफ द म्याच पनि अनन्त नै घोषित भएका थिए । अब सुदूरपश्चिम-११ ले क्वाटरफाइनलमा सताक्षी गोल्डकप च्याम्पिन नेपाल आर्मीसँग भिड्दै छ ।