काठमाडौं (हाम्रो खेलकुद)– त्रिभुवन आर्मी क्लबले सताक्षी गोल्ड कप फुटबल प्रतियोगिताको उपाधि जितेको छ । ए डिभिजन डर्बीमा लक्ष्मी हुन्डाई मनाङ मस्र्याङ्दी क्लबलाई २–१ ले हराउँदै आर्मी वर्षको दोस्रो उपाधि जितेको छ ।

आर्मीले वैशाखमा विशाल स्मृति गोल्ड कपको उपाधि जितेको थियो । मनाङ वर्षको दोस्रो उपाधि जित्नबाट विमुख रह्यो । मनाङले भदौंमा जेसिस गोल्ड कप जितेको थियो । झिलझिलेमा आज आर्मीका लागि जर्ज प्रिन्स कार्की र नवयुग श्रेष्ठले गोल गरे । मनाङका लागि अनिल गुरुङले गोल गरे ।

जर्ज प्रिन्सले १८ औं मिनेटमा फ्रिकिकमार्फत गोल गरेका थिए । नवयुगलाई मनाङका सोलेले फाउल हानेपछि आर्मीले फ्रिकिक पाएको थियो । नवयुगले पहिलो हाफको अन्तिम मिनेटमा गोल गर्दै आर्मीको अन्तरलाई दोब्बर पारे । ६१ औं मिनेटमा मनाङका कप्तान अनिलले गोल फर्काएका थिए ।

मनाङ सर्वाधिक गत वर्षको सफल टोली हो । टोलीले ४ उपाधि जितेको थियो । आर्मी र सिएमजी क्लब संकटाले समान ३ उपाधि जितेका थिए । गत वर्ष तीन फाइनल खेलेमध्ये आर्मीले २ र मनाङले एउटा उपाधि जितेको थियो ।
सताक्षी धाम स्पोर्टिङ क्लबले आयोजना गरेको प्रतियोगिताको विजेता आर्मीले उपाधिसहित ५ लाख र मनाङले २ लाख ५० हजार रुपैयाँ प्राप्त गरेको छ ।

सताक्षी गोल्ड कप फुटबल प्रतियोगितामा

सर्वोत्कृष्ट खेलाडी – विशाल राई (मनाङ)
उत्कृष्ट गोलकिपर – विकेश कुथु (आर्मी)
उत्कृष्ट रक्षक – सुमन आर्याल (आर्मी)
उत्कृष्ट मिडफिल्ड – डोना थापा (मनाङ)
उत्कृष्ट फरवार्ड – जर्ज प्रिन्स कार्की (आर्मी)
उत्कृष्ट प्रशिक्षक – नवीन न्यौपाने (आर्मी)
सर्वोत्कृष्टले ५० हजार, विधागत उत्कृष्टले समान २० र उत्कृष्ट प्रशिक्षकले १० हजार रुपैयाँ प्राप्त गरे ।