काठमाडौं (हाम्रो खेलकुद) – राजधानीमा जारी कोकाकोला अन्तर स्कुल पुरुष तथा महिला फुटबल प्रतियोगितामा सेतीदेवी, श्री शंकर र भुम्रे विजयी भएका छन् ।

सातदोबाटोस्थित एन्फा कम्प्लेक्सको खेल मैदानमा सोमबार भएको खेलमा सिन्धुपाल्चोकको सेतीदेवी शारदा स्कुलले काठमाडौंको अमर स्कुललाई १–० ले पराजित गरेको हो । ६४ औं मिनेटमा प्रिती राईले गरेको गोल नै सेतीदेवीको जितमा निर्णायक बन्यो ।

अर्काे खेलमा श्री शंकर सरस्वती, कैलालीले श्री दुर्गा सेकेण्डरी स्कुल रौतहटमाथि ३–२ को कठिन जित निकाल्यो । प्रतिस्पर्धात्मक बनेको खेलमा श्री शंकरकी गोमा थापाले २० औं मिनेटमा टिमलाई सुरुवाती अग्रता दिलाएकी थिईन् ।

रश्मी कुमारी घिसिङले ४४ औं मिनेटमा अग्रता दोब्बर पारेकी थिईन् । इश्वारी रावलले ५० औं मिनेटमा अर्काे गोल थप्दै टोलीलाई ३–० को सहज स्थितिमा राखेकी थिईन् । तर दुर्गा सेकेण्डरी स्कुलका सविता राना मगर र रेखा पौडलले गोल गरे पनि टोलीलाई जित दिलाउन सकेनन् ।

यस्तै अर्काे खेलमा स्याङ्जाको भुम्रे सेकेण्डरी स्कुलले छहारी शिक्षा सदनलाई ७-० को फराकिलो अन्तरले हरायो । भुम्रेको सहज जितमा सुनिता कुमाल र उदया थापाले समान २–२ गोल गरे । सरस्वती हमाल र दमान्ती पंगेनीले १–१ गोल गर्दा एक गोल भने आत्मघाती गोल रह्यो ।

यस्तै पुरुषतर्फ गजुरमुखी स्कुल तेस्रो भएको छ । तेस्रो स्थानको लागि भएको खेलमा गजुरमुखीले महेन्द्र मेमोरियल एकेडेमीलाई सडनडेथमा ५–४ ले पराजित गर्‍यो । निर्धारित समयको खेल १–१ गोलको बराबरीमा सकिएपछि खेलको निर्णय पेनाल्टी सुट आउटबाट भएको थियो ।